बैंकिङ खबर/सार्वजनिक ऋण व्यवस्थापन कार्यालयले चालू आर्थिक वर्ष २०८२/०८३ को प्रथम, द्वितीय र तृतीय चौमासिक अवधिमा उठाउने आन्तरिक ऋणको तालिका सार्वजनिक गरेको छ। कार्यालयका अनुसार यस अवधिमा सरकारले कुल १० अर्ब रुपैयाँ बराबरका विभिन्न भुक्तानी अवधिका विकास ऋणपत्रहरू जारी गर्नेछ।
प्रथम चौमासिकअन्तर्गत साउन ७ गते ३ वर्षे भुक्तानी अवधि रहेको ऋणपत्रको बोलकबोल गरिनेछ भने साउन ८ गते सो ऋणपत्र निष्कासन गरिनेछ। त्यसपछि साउन १४ गते ४ वर्षे, साउन २१ गते ११ वर्षे र साउन २८ गते ८ वर्षे भुक्तानी अवधिका ऋणपत्रहरूको बोलकबोल हुने तालिका रहेको छ। यी ऋणपत्रहरू क्रमशः साउन १५, २२ र २९ गते निष्कासन गरिनेछ।
दोस्रो चौमासिकभित्र भदौ ४ गते १० वर्षे ऋणपत्रको बोलकबोल र भदौ ५ मा निष्कासन गरिनेछ। त्यस्तै भदौ ११ गते ३ वर्षे, भदौ १८ मा ९ वर्षे र भदौ २५ मा ६ वर्षे ऋणपत्रहरूको बोलकबोल हुने तय भएको छ। तिनीहरू क्रमशः भदौ १२, १९ र २६ मा निष्कासन गरिनेछन्।
तेस्रो चौमासिक अवधिमा असोज १ गते ११ वर्षे ऋणपत्रको बोलकबोल गरिनेछ भने असोज २ मा निष्कासन हुनेछ। त्यसपछि असोज २२ मा ७ वर्षे र असोज २९ मा ५ वर्षे ऋणपत्रको बोलकबोल हुनेछ, जुन क्रमशः असोज २३ र ३० मा निष्कासन गरिनेछ।
सरकारले आन्तरिक स्रोतबाट उठाउने यी ऋणहरू बजेट घाटा पूर्ति र विकास खर्चका लागि प्रयोग गर्ने लक्ष्य लिएको छ। भिन्न भिन्न अवधिका ऋणपत्रहरू जारी गरी सरकार वित्तीय बजारलाई थप सशक्त बनाउने उद्देश्यमा रहेको बताइएको छ।
