बैंकिङ खबर/अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईले भ्रष्टाचार गरेर विदेशमा लुकाइएका सम्पत्ति फिर्ता ल्याउन सरकारले नै नचाहेको बताएका छन् ।
राष्ट्रियसभा अन्तर्गतको सङ्घीयता सबलीकरण तथा राष्ट्रिय सरोकार समितिको बैठकमा उनले सिङ्गापुर, अमेरिका र युरोपमा लुकाइएका सम्पत्ति फिर्ताका लागि ती मुलुक सहमत रहेपनि नेपाल सरकारले नै नचाहेको उल्लेख गरे ।
‘हामीले अहिलेपनि सिङ्गापुर, अमेरिका र युरोपमा भएको पैसा ल्याउनसक्ने अवस्था छैन । यसमा तपाईंहरूले सहयोग गर्नुपर्यो,’ प्रमुख आयुक्त राईले समितिमा भने, ‘सिङ्गापुरले त भ्रष्टाचार भएको पैसा पठाइदिन्छु भने पनि सरकारको तर्फबाट काम अगाडि बढेन । कार्यदल बनाएपनि काम भइरहेको छैन ।’
अख्तियारले भ्रष्टाचारमा संलग्न उपल्लो तहका नेतालाई समेत कारबाहीको दायरामा ल्याउन चाहेपनि अभियुक्त कर्मचारीहरूले अहसयोग गर्दा सफल नभएको बताए । ‘बलिको बोको कर्मचारी मात्रै भयो भन्ने जनगुनासो छ । उपल्लो तहको मान्छेका सन्दर्भमा बयान लिइएका कर्मचारी नै केही बोल्दैनन्,’ उनले भने ।
