काठमाडौं / नेपाल टेलिकमले बाढीका कारण प्रभावित भएका थप चारवटा मोबाइल साइट पुनः सञ्चालनमा ल्याएको छ। टेलिकमले २०८३ भदौ १५ गते रसुवाको जिबजिबे र सरमथली, धादिङको बेनीघाट तथा नुवाकोटको त्रिशूली बजारस्थित साइट सुचारु गरेको हो।यससँगै बाढीका कारण प्रभावित भएका नेपाल टेलिकमका कुल १२० साइटमध्ये ११० वटा साइट सञ्चालनमा आएका छन्। बाँकी प्रभावित साइटहरू पनि क्रमशः पुनः सञ्चालनमा ल्याउने कार्य भइरहेको टेलिकमले जनाएको छ।
जिबजिबे टावर सञ्चालनमा आएसँगै भोर्ले, चिती, गाइसौरा लगायत नौकुण्ड गाउँपालिकाका वडा नम्बर ५ र ६ का विभिन्न स्थानका सेवाग्राहीले सञ्चार सेवा सहज रूपमा प्रयोग गर्न सक्नेछन्।त्यस्तै, सरमथली टावरबाट यार्सा, लच्याङ, सिमबन्दी, बिजिलीजोङ लगायत आसपासका क्षेत्रका सेवाग्राही लाभान्वित हुनेछन्।धादिङको बेनीघाट साइट सञ्चालनमा आएपछि बेनीघाट बजार तथा आसपासका क्षेत्रमा सञ्चार सेवा सहज हुनेछ। त्यसैगरी, नुवाकोटको त्रिशूली साइट सञ्चालनमा आएसँगै त्रिशूली बजार, ढुंगे लगायत आसपासका क्षेत्रमा नेपाल टेलिकमको सञ्चार सेवा पुनः सहज भएको छ।
बाढी तथा पहिरोका कारण अवरुद्ध भएका सञ्चार सेवा पुनः सञ्चालन गर्न टेलिकमले प्रभावित क्षेत्रमा प्राविधिक टोली परिचालन गर्दै आएको जनाएको छ। थप प्रभावित साइटहरू पनि सम्भव भएसम्म छिटो सञ्चालनमा ल्याउने प्रयास भइरहेको टेलिकमको भनाइ छ।
थप जानकारीका लागि: नेपाल टेलिकम, सूचना तथा प्रकाशन शाखा, केन्द्रीय कार्यालय, भद्रकाली प्लाजा, काठमाडौं। सम्पर्क नं. ०१–४२१०३७८, ०१–४२१०३०२।
