बैंकिङ खबर/ नेपाल राष्ट्र बैंकले व्यवसायिक कारोबारमा व्यक्तिगत क्युआर कोड प्रयोग नगर्न चेतावनी दिएको छ। एक सचेतनामूलक भिडियो सार्वजनिक गर्दै राष्ट्र बैंकले व्यापारीहरूलाई मर्चेन्ट क्युआर प्रणाली अपनाउन आग्रह गरेको हो।
भिडियोमा देखाइए अनुसार, एक ग्राहकले पसलमा किनमेल गरेपछि व्यापारीले भुक्तानी आफ्नै व्यक्तिगत क्युआरमा गर्न अनुरोध गर्छन्। तर ग्राहकले त्यो अस्वीकार गर्दै कानूनी प्रक्रिया अनुसार पसलको मर्चेन्ट क्युआरमा भुक्तानी गर्न आग्रह गर्छन्। ग्राहकले व्यापारीलाई सम्झाउँछन्, “व्यवसायिक कारोबारमा व्यक्तिगत क्युआर प्रयोग गर्नु गैरकानुनी मात्र हैन, त्यसले तपाईको सम्पत्ति वैध ठहर्दैन।”
व्यापारी सुरुमा यस कुरालाई सामान्य ठान्छन्, तर ग्राहकको जोडपछि मर्चेन्ट क्युआरमार्फत भुक्तानी लिन्छन्। भिडियोको अन्त्यमा स्पष्ट सन्देश दिइएको छ – “व्यवसायिक प्रयोजनमा व्यक्तिगत क्युआर प्रयोग नगर्नुहोस्। यसो गर्दा सम्पत्ति अवैध हुन सक्छ र कानूनी कारबाहीको भागिदार बन्नुपर्ने जोखिम हुन्छ।”
