नेपाल राष्ट्र बैंकले बुधबार १० अर्ब रुपैयाँ बराबरको रिभर्स रिपो जारी गर्ने भएको छ । राष्ट्र बैंकले ७ दिने अवधिको रिपो निष्काशन गर्न लागेको हो । सो रिपो साउन १२ गते परिपक्व हुनेछ । रिपोमा बैंक, विकास बैंक र वित्त कम्पनीहरुले लगानी गर्न पाउनेछन् । रिपो किन्नका लागि मास्टर्स रिपर्चेज एग्रिमेन्ट अनिवार्य हुनुपर्नेे राष्ट्र बैंकले जनाएको छ । रिपोमा सहभागी हुन बैंकहरुले अनलाइन बिडिङ गर्नुपर्नेछ । बोलकबोलमा परेको सबैभन्दा कम व्याजदरलाई आधार मानेर व्याजदर निर्धारण गरिने छ ।
असारको अन्तिममा सरकारी विकास खर्च अत्यधिक बढेसँगै बढ्दो क्रममा रहेको अधिक तरलता प्रशोचनका लागि रिभर्स रिपो जारी गर्न लागेको नेपाल राष्ट्र बैंकले जनाएको छ । गत आर्थिक वर्षभरीमा राष्ट्र बैंकले पटक–पटक गरी साढे ५ खर्ब रुपैयाँ तरलता प्रशोचन गरेको थियो ।
