गण्डकी विकास बैंक लिमिटेडले २५ प्रतिशत अर्थात चार बराबर एकको अनुपातमा हकप्रद सेयर निष्काशन गर्ने भएको छ । हकप्रद निष्काशनको अनुमति माग गर्दै बैंकले नेपाल धितोपत्र बोर्डमा निवेदन दिएको छ । उक्त हकप्रद सेयर जारी गरेपछि दुई अर्ब ३० करोड रुपैयाँ चुक्तापुँजी पुग्ने र राष्ट्र बैंकले तोकेको चुक्तापुँजी बोनस सेयर जारी गरेर पुर्याउने बैंकले जनाएको छ ।
गण्डकी विकास बैंक राष्ट्रिय स्तरको विकास बैंक हो । नेपाल राष्ट्र बैंकले राष्ट्रिय स्तरका विकास बैंकलाई दुई अर्ब ५० करोड रुपैयाँ चुक्तापुँजी पुर्याउन निर्देशन दिएको छ । आर्थिक वर्ष २०७३।७४ सम्मको अपरिष्कृत वित्तीय विवरण अनुसार बैंकले हाल कायम रहेको चुक्तापूँजीको २३ प्रतिशत सम्म वोनस सेयर वितरण गर्न सक्ने देखिन्छ ।
गण्डकी विकास बैंक लिमिटेडले गत आर्थिक वर्षमा ८५ करोड रुपैयाँ संचालन मुनाफा आर्जन गरेको थियो । असार मसान्तसम्ममा बैंकले १८ अर्ब ३३ करोड रुपैयाँ निक्षेप संकलन गरी १६ अर्ब ५१ करोड रुपैयाँ कर्जा लगानी गरेको छ । बैंकको निष्कृय कर्जा ०.४ प्रतिशत रहेको छ ।
गण्डकी विकास बैंकले केन्द्रीय कार्यालयसहित देशभरका ५३ वटा शाखा कार्यालयमार्फत आकर्षक व्याजदरमा विभिन्न निक्षेप योजना, सहज र सरल रुपमा कर्जा योजनाको साथमा एबिबिएस, एटिएम, एसएमएस बैंकिङ्ग सेवा, लकर सेवा, सुन धितोमा कर्जा सुविधा र रेमिट्यान्स सेवा प्रदान गर्दै आएको छ । साथमा प्रधान कार्यालय लगायत केही शाखाहरुबाट ३६५ दिन बैंकिङ सेवा तथा सन्ध्याकालिन सेवा पनि प्रदान गर्दै आइरहेको बैंकले जनाएको छ । गण्डकीले न्यून आय भएका व्यक्तिलाई विपन्नवर्ग कर्जा तथा समुहमा आवद्घ लघु वित्तकर्जा समेत दिँदै आइरहेको छ ।
बैंकले निकट भविष्यमा विर्तामोड, विराटनगर, काठमाडौँको सामाखुशी, र रुपन्देहीको अमुवा गरी चार वटा थप शाखा संचालनमा ल्याउने तयारी गरिरहेको बैंकका सीईओ रेशम बहादुर थापाले बताए ।
