हरेक साताको अन्तिम दिन शुक्रबार बैंकिङ खबर डट कमले साताभरिका बैंकिङ समाचारहरुलाई एउटै पानामा समेट्दै आइरहेको छ । यस साता पनि बैंक तथा वित्तीय क्षेत्रसँग सम्बन्धित विभिन्न गतिविधिहरु भए । बैंक तथा वित्तीय संस्थासम्बन्धी विभिन्न समाचार तथा गतिविधिहरुलाई सञ्चार माध्यमहरुले महत्वका साथ प्रकाशन तथा प्रशारण गरे । समग्रमा, साताको सुरुवातदेखि बैँक तथा वित्तीय क्षेत्रमा भएका प्रमुख गतिविधिहरु यहाँ प्रस्तुत गरिन्छ :
नोट केरमेट गर्नेलाई कैद
नोट तथा सिक्काको हिफाजत नगर्नेलाई तीन महिनासम्म कैद वा पाँच हजार रुपैयाँसम्मको जरिवाना हुने भएको छ । व्यवस्थापिका संसद्ले पारित गरेको फौजदारी संहितामा नोट वा सिक्का जलाउने, गाल्ने, च्यात्ने वा केरमेट गर्ने व्यक्तिलाई तीन महिनासम्म जेल सजाय वा पाँच हजार रुपैयाँसम्मको जरिवाना हुन सक्ने उल्लेख गरिएको छ । व्यवस्थापिका संसद्ले मुलुकु ऐन २०२० लाई विस्थापन गर्दै नयाँ कानून बनाएको हो ।
बीमा विधेयक संसदमा
जनतालाई गुणस्तरीय स्वास्थ्य सेवा बीमामार्फत उपलब्ध गराउन बनेको स्वास्थ्य बीमा विधेयक तीन महिनापछि संसधमा छलफलका लागि प्रस्तुत भयो । स्वास्थ्यमन्त्री गिरिराजमणि पोखरेलले स्वास्थ्य मन्त्रालयको कार्यभार सम्हालेपछि पहिलो विधेयकका रुपमा स्वास्थ्य बीमा विधेयक संसधमा प्रस्तुत गरेका हुन् ।
चालू आर्थिक वर्षमा उठाउने आन्तरिक ऋणको तालिका सार्वजनिक
नेपाल राष्ट्र बैंकले चालू आर्थिक वर्षमा सरकारका लागि उठाउने आन्तरिक ऋणको तालिका सार्वजनिक गरेको छ । उक्त तालिकाअनुसार, सरकारले चालु बर्षका लागि एक खर्ब ४५ अर्ब रुपैयाँ आन्तरिक ऋण उठाउने योजना बनाएको छ । जसमध्ये, ट्रेजरी बिल्समार्फत ६६ अर्ब रुपैयाँ, विकास ऋणपत्रमार्फत ७२ अर्ब रुपैयाँ र बाँकी नागरिक बचतपत्र तथा वैदेशिक रोजगार बचतपत्रमार्फत उठाउने बताइएको छ ।
अनलाइन आस्वाको लहर
सिटिजन्स बैंक इन्टरनेसनल लिमिटेडले धितोपत्रको दरखास्त लिने प्रकृयालाई अझ सरल, प्रभावकारी एवं सहज बनाउन अनलाइन मार्फत दरखास्त दिन सकिने सेवा सुरु गर्यो । राष्ट्रिय वाणिज्य बैंकले पनि शुक्रबारदेखि अनलाइन आस्वा सेवा सुरु गर्यो । त्यस्तै, टुरिजम डेभलपमेन्ट बैंकले पनि अनलाइन आस्वा सेवाको सुरुवात गर्यो । यसै साताको आइतबारदेखि एनआईसी एसिया बैंकले पनि अनलाइन आस्वा सेवाको सुरुवात गर्यो ।
सिद्धार्थ बैंकमा नयाँ सिईओ
सिद्धार्थ बैंक लिमिटेडको प्रमुख कार्यकारी अधिकृत (सिईओ)मा शम्भुनाथ गौतम नियुक्त भए । बैंक संचालक समितिको बुधबार बसेको बैठकले गौतमलाई विहीबारदेखि लागू हुनेगरी बैंकको आगामी कार्यकालका लागि सिईओ नियुक्त गरेको हो । यसअघि सिद्धार्थ बैंकमै डेपुटी सीईओको रुपमा कार्यरत गौतमलाई बैंकको जेठ २२ गते बसेको सञ्चालक समितिको बैठकले कामु सिईओ नियुक्त गरेको थियो । तत्कालीन सिइओ सुरेन्द्र भण्डारीले राजीनामा दिएर कुमारी बैंकतिर लागेपछि सिद्धार्थ बैंकमा सिईओको पद रिक्त रहेको थियो ।
अन्य
- एनआईसी एशिया बैंक लिमिटेडले बाजुरा जिल्लाको सदरमुकाम मार्तडीमा वित्तीय पहुँच तथा सबलिकरणको लागि बैंकिङ्ग सेवा पुर्यायो ।
- सिद्धार्थ बैंक लिमिटेडले भक्तपुरको कमलबिनायकमा नयाँ शाखा कार्यालयको स्थापना गर्यो ।
- मुस्लीम समुदायको पवित्र धार्मिक स्थल साउदी अरबको मक्का मदिनामा २०७४ सालको हजयात्राका लागि गएका १,२५० जना नेपाली हजयात्रीहरुलाई प्रभु बैंक लिमिटेडले अमेरिकी डलर र साउदी रियाल सटही सुविधा उपलब्ध गरायो ।
- इजी लिंक रेमिट्यान्स प्रा.लि. र कुमारी बैंक लिमिटेड बीच रेमिट्यान्स भुक्तानी सम्बन्धि सम्झौता भयो ।
