नेपाल राष्ट्र बैँकका गभर्नर डा. चिरञ्जिवी नेपालले नेपालको वित्तिय अवस्थाबारे अन्तर्राष्ट्रिय बैँकरहरुसँग छलफल गरेका छन् । अन्तर्राष्ट्रिय मुद्रा कोष (आईएमएफ) र विश्व बैँकको संयुक्त आयोजना रहेको २०१६ स्प्रिङ मिटिङमा सहभागी हुन अमेरिका पुगेका गभर्नर डा. नेपालले बसाई अवधिभर त्यहाँका विभिन्न बैँकरहरुसँग भेटवार्ता गर्ने कार्यक्रम रहेको छ । त्यहाँ रहेर उनले अमेरिका लगायत विभिन्न समृद्ध मुलुकको बैँकिङ प्रणालीको बारेमा राम्ररी अध्ययन तथा अनुसन्धान गर्ने र नेपालको बैँक तथा वित्तिय क्षेत्रलाई पनि अन्तर्राष्ट्रिय स्तरमा विस्तार गर्न पहल गर्ने बताइएको छ ।
सम्मेलन अप्रिल १२ देखि १७ अर्थात् चैत्र ३० देखि वैशाख ५ गतेसम्म अमेरिकाको राजधानी वासिङटन डिसीमा हुँदैछ । सम्मेलनमा हजारौँ सरकारी अधिकारीहरु, पत्रकार, नागरिक समाज संगठनहरु र विभिन्न नीजिस्तरका अधिकारीहरुको सहभागिता रहने जनाइएको छ । सम्मेलन विश्व अर्थतन्त्र, अन्तर्राष्ट्रिय विकास र विश्व वित्तिय बजारको विषयमा केन्द्रित रहनेछ ।
गत चैत्र २६ गते अमेरिका पुगेका डा. नेपाल सम्मेलनमा सहभागी भएर आगामी बैशाख ७ गते स्वदेश फर्किने कार्यक्रम रहेको छ ।
