नेपाल एसबिआई बैंक लिमिटेडले चालु आर्थिक बर्षको पुस मसान्तसम्ममा ७५ करोड ८७ लाख २५ हजार रुपैयाँ खुद मुनाफा आर्जन गरेको छ । बैंकले गत आर्थिक वर्षको सोही अवधिको तुलनामा २१.६० प्रतिशत बढी नाफा कमाएको हो । गत आर्थिक वर्षको दोस्रो त्रैमासमा नेपाल एसबीआई बैंकले ६२ करोड ३९ लाख २८ हजार रुपैयाँ खुद नाफा कमाएको थियो ।
चुक्ता पुँजीमा ८२ करोड ५६ लाख रुपैयाँ वृद्धि गरी तीन अर्ब ८८ करोड २७ लाख ३६ हजार रुपैयाँ पुर्याएको बैंकको खुद ब्याज अम्दानी १७.१५ प्रतिशतले बढेको छ भने सञ्चालन मुनाफा २५.६२ प्रतिशतले बढेको छ । पुस मसान्तसम्ममा बैंकको खुद व्याज आम्दानी एक अर्ब ४५ करोड १३ लाख ६२ हजार रुपैँया पुगेको छ भने सञ्चालन मुनाफा एक अर्ब १७ करोड रुपैयाँ पुगेको छ । गत आर्थिक वर्षको सोही अवधिको नेपाल एसबीआईको खुद व्याज आम्दानी एक अर्ब १४ करोड १४ लाख ५७ हजार रुपैयाँ थियो भने सञ्चालन मुनाफा ९२ करोड ७१ लाख रुपैयाँ रहेको थियो । त्यस्तै, छ महिनाको अवधिमा बैंकले ७७ अर्ब ५९ करोड ९३ लाख निक्षेप संकलन गरी ५९ अर्ब ७७ करोड २३ लाख रुपैँया कर्जा परिचालन गरेको छ ।
दुई करोड ६८ लाख ३६ हजार रुपैयाँ राइट ब्याक गर्न एसबीआई बैंक सफल भएको छ । खराबकर्जा अनुपातलाई ०.१७ बाट घटाएर ०.१२ प्रतिशतमा झार्न सफल रहेको बैंकले प्रोभिजनमा १५ करोड ९३ लाख ८४ हजार रुपैयाँ र जगेडा कोषमा तीन अर्ब ८५ करोड रुपैयाँ राखेको छ । बैंकको प्रतिसेयर आम्दानी ४० रुपैयाँ ४१ पैसाबाट घटेर ३९ रुपैयाँ ०७ पैसा कायम भएको छ । बैंकको प्रतिसेयर नेटवर्थ १९९.२० पैसा,मूल्य आम्दानी अनुपात ३६.२९ गुणा रहेको छ ।
