आफ्नो १३ औं वार्षिक उत्सवका अवसर पारेर मोबाइल सेवा प्रदायक नेपाल टेलिकमले ग्राहकका लागि छुटै छुटका प्याकेजहरु सार्वजनिक गरेको छ । आज (आइतबार)देखि आगामी फागुन ७ गतेसम्म जिएसएम र सिडिएमए प्रिपेडका सबै रिचार्जमा ३ दिनको भ्यालिडिटी सहित टेलिकमले आफ्ना ग्राहकलाई बोनस दिने भएको हो । ५० रुपैयाँको रिचार्ज गर्दा १०, दुई सय रुपैयाँको रिचार्ज गर्दा १० र पाँच सय, हजार रुपैयाँ रिचार्जका १५ प्रतिशत बोनस दिने टेलिकमले सूचनामार्फत जनाएको छ ।
त्यसैगरी टेलिकमले अनलिमिटेड एडिएसएल सेवामा ब्याण्डविथको स्तरोन्नति गर्ने भएको छ । यो सेवा लिने सेवाग्राहीका लागि नयाँ शुल्क निर्धारण गरिएको छैन । हाल ग्राहकले तिरेको शुल्कमा यो सेवा लिन पाइने छ ।
एडिएसएलका ग्राहकले ९ सय रुपैयाँमा २५६ केपिबिएसको इन्टरनेट सेवा पाउनेछन् । हाल ३८४ केपिबिएस गतिको इन्टरनेट सेवा लिइरहेका सेवाग्राहीले १५ सय रुपैयाँमा ५१२ केपिबिएसको इन्टरनेट सेवा पाउने छन् । ५१२ केपीबिएसको इन्टरनेट चलाइरहेका एडिएसएलका ग्राहकले ७३८ केपिबिएसको इन्टरनेट सेवा पाउने भएका छन् ।
फागुन महिनामा ल्याण्डलाइनका ग्राहकले मासिक रेन्टल चार्जमा अतिरिक्त २५ कलको सुविधा पनि पाउनेछन् । यस्तै फोरजीका नयाँ सस्क्राइबरले चार दिनसम्म १० एमबीको डाटा निःशुल्क प्राप्त गर्नेछन् । टेलिकमले हिजो (शनिबार)देखि पोखरा र काठमाडौंमा प्रिपेड मोबाइलमा पनि फोरजी सेवा सुरु गरिसकेको छ । जिएसएम नेटवर्कका ग्राहकले २० रुपैयाँमा पाँच दिन भ्यालिडिटी भएको सय एमबीको डाटा पाउने टेलिकमले जनाएको छ ।
