बैंकिङ खबर / कुमारी बैंक लिमिटेडले देशका विभिन्न जिल्लामा आएको बाढी तथा प्राकृतिक प्रकोपबाट प्रभावित समुदायको राहत, उद्धार तथा पुनःस्थापनाका लागि ३ करोड ३९ लाख रुपैयाँ बराबरको सहयोग उपलब्ध गराएको छ । बैंकले संस्थागत सामाजिक उत्तरदायित्व (सीएसआर) अन्तर्गत उक्त सहयोग गरेको जनाएको हो ।
बैंकका अनुसार बाढी तथा प्राकृतिक प्रकोपबाट प्रभावित परिवारलाई तत्काल राहत तथा मानवीय सहायता उपलब्ध गराउने उद्देश्यले ३ करोड रुपैयाँ प्रधानमन्त्री दैवी प्रकोप उद्धार कोषमा जम्मा गरिएको छ । विपद्बाट प्रभावित नागरिकलाई खाद्यान्न, अस्थायी आश्रय तथा अन्य आवश्यक सामग्री उपलब्ध गराउने कार्यमा सहयोग पुग्ने गरी उक्त रकम प्रदान गरिएको बैंकले जनाएको छ ।
आर्थिक सहयोगसँगै बैंकले विपद् प्रभावित क्षेत्रमा खोज तथा उद्धार र अनुगमन कार्यलाई थप प्रभावकारी बनाउन आवश्यक उपकरणसमेत उपलब्ध गराएको छ । बैंकले करिब ३९ लाख रुपैयाँ बराबरका ५ वटा अत्याधुनिक क्यामेरा जडित निगरानी ड्रोन, ५ केभीए क्षमताका ३ वटा पोर्टेबल जेनेरेटर र १०० वटा पावर बैंक नेपाली सेनाको नुवाकोटस्थित क्याम्पमा हस्तान्तरणका लागि पठाएको जनाएको छ ।
विपद्का समयमा प्रभावित क्षेत्रमा सञ्चार तथा विद्युत् सेवामा अवरोध आउन सक्ने भएकाले उद्धार तथा अनुगमनमा प्रविधिको प्रयोग महत्वपूर्ण हुने बैंकको भनाइ छ । निगरानी ड्रोनमार्फत दुर्गम तथा जोखिमयुक्त क्षेत्रमा प्रभावित अवस्थाको अनुगमन तथा सम्भावित जोखिम पहिचान गर्न सहयोग पुग्ने अपेक्षा गरिएको छ। त्यस्तै, पोर्टेबल जेनेरेटर र पावर बैंकले खोज तथा उद्धारमा खटिने सुरक्षाकर्मी तथा अन्य सम्बन्धित निकायलाई आवश्यक विद्युत् तथा सञ्चार सुविधा उपलब्ध गराउन सहयोग गर्ने बैंकले जनाएको छ ।
हालै आएको बाढी तथा प्राकृतिक प्रकोपबाट रसुवा, नुवाकोट, धादिङ, गोरखा, चितवनलगायतका जिल्लाहरू प्रभावित भएका छन् । कतिपय क्षेत्रमा बाढी, पहिरो तथा अन्य प्राकृतिक विपद्का कारण जनजीवन प्रभावित हुनुका साथै आवागमन, सञ्चार तथा अन्य पूर्वाधारमा समेत असर परेको छ। यस्तो अवस्थामा प्रभावित नागरिकको उद्धार, राहत वितरण र पुनःस्थापनाका लागि सरकारी तथा गैरसरकारी क्षेत्रबाट सहयोग आवश्यक देखिएको छ ।
कुमारी बैंकले नेपाल सरकार तथा सम्बन्धित निकायसँग समन्वय गर्दै आफ्नो सामाजिक उत्तरदायित्वअन्तर्गत सहयोग उपलब्ध गराएको जनाएको छ। बैंकका अनुसार विपद्का समयमा तत्काल आवश्यक पर्ने राहत तथा उद्धारका साधन उपलब्ध गराउँदा प्रभावित समुदायलाई परेको कठिनाइ न्यूनीकरण गर्न सहयोग पुग्नेछ ।
बैंकले प्राकृतिक विपद् तथा मानवीय संकटका समयमा समुदायप्रतिको आफ्नो दायित्वलाई प्राथमिकतामा राख्दै विभिन्न सामाजिक गतिविधिमा सहयोग गर्दै आएको जनाएको छ । पछिल्लो सहयोग पनि बैंकको सामाजिक उत्तरदायित्वअन्तर्गत प्रभावित समुदायलाई तत्काल राहत पुर्याउने तथा उद्धार कार्यमा आवश्यक स्रोतसाधन उपलब्ध गराउने उद्देश्यले गरिएको हो ।
कुमारी बैंकले विपद्को यस कठिन घडीमा प्रभावित नागरिकप्रति गहिरो दुःख व्यक्त गर्दै राहत, उद्धार तथा पुनःस्थापनाका कार्यलाई थप प्रभावकारी बनाउन सम्बन्धित सबै निकायसँग आग्रह गरेको छ। साथै, विपद्का कारण घाइते भएकाहरूको शीघ्र स्वास्थ्यलाभको कामना गर्दै बेपत्ता नागरिकको सुरक्षित खोज तथा उद्धारका लागि आवश्यक पहल गर्न सम्बन्धित निकायलाई आग्रह गरेको छ ।
