नेपाल राष्ट्र बैंकले बैंकिङ प्रणालीमा पुनः १० अर्ब रुपैयाँ तरलता (लगानीयोग्य पुँजी) पठाएको छ । बैंक तथा वित्तीय संस्थामा तरलता अभाव भएको भन्दै राष्ट्र बैंकले रिपो बोलकबोलमार्फत तरलता पठाएको हो । राष्ट्र बैंकले १४ दिनका लागि ४.८७०१ प्रतिशत व्याजदरमा आइतबार रिपो जारी गरेको हो ।
आह्वान गरिएको रकमभन्दा बढी माग भएमा समानुपातिक रुपमा बाँडफाँट गरिने राष्ट्र बैंकले जनाएको छ । रिपो उपकरणको भुक्तानी मितिका दिन निर्धारित साँवा तथा ब्याज रकम सम्बन्धित बैंकको यस बैंकमा रहेको खाता खर्च गरी भुक्तानी लिइने बताइएको छ ।
राष्ट्र बैंकले शुक्रबार पनि २० अर्ब रुपैयाँ बराबरको रिपो जारी गरी बैंकिङ प्रणालीमा तरलता पठाएको थियो । बैंक तथा वित्तीय संस्थाहरुको नियामक निकाय भएको नाताले बैंकिङ प्रणालीमा तरलता सन्तुलन कायम गर्ने जिम्मेवारी नेपाल राष्ट्र बैंकलाई दिइएको छ । त्यसैले, राष्ट्र बैंकले बैंकिङ प्रणालीमा तरलता अभाव हुँदा रिपोमार्फत पठाउने र तरलता बढी हुँदा रिभर्स रिपोमार्फत प्रशोचन गर्ने गर्दछ ।
