बैंकिङ खबर/ भारतीय रेल्वेले यात्रुहरूको सुविधाका लागि मुम्बई–मनमाड चल्ने पञ्चवटी एक्सप्रेसमा देशकै पहिलो ट्रेन एटीएम जडान गरेको छ।
अब यात्रुले यात्रा गर्ने क्रममा नै सजिलै नगद झिक्न सक्ने भएका छन्। यो एटीएम पञ्चवटी एक्सप्रेसको एसी डिब्बामा जडान गरिएको छ । यसको परीक्षण सफलतापूर्वक सम्पन्न भएको भारतीय सञ्चारमाध्यमले जनाएका छन् ।
यस एटीएममार्फत् रेल चलिरहेका बेला पनि यात्रुले नगद झिक्न सक्नेछन्। यो सेवा भारतीय रेलवेको नवप्रवर्तन तथा गैर-भाडा आम्दानी योजना अन्तर्गत ल्याइएको हो। यो परियोजना भारतीय रेलवेको भुसावल डिभिजन र बैंक अफ महाराष्ट्रको सहकार्यमा शुरू गरिएको हो।
रेल्वे अधिकारीहरूका अनुसार परीक्षण उत्कृष्ट रहेको र यात्रा अवधिभर एटीएमले निर्वाध काम गरेको छ। यद्यपि, इगतपुरी र कसारा खण्डमा केही समय सञ्जाल समस्या आएको थियो, किनभने यो क्षेत्र सुरुङ र कमजोर मोबाइल सिग्नलको कारण चिनिन्छ।
भुसावलका मण्डल रेल प्रबन्धक इति पाण्डेले भनिन्, ‘परीक्षणको परिणाम सकारात्मक रह्यो। अब यात्रुहरूले यात्रा गर्दै गर्दा पनि नगद झिक्न सक्नेछन्। हामी एटीएमको कार्यसम्पादनमा निरन्तर निगरानी राख्नेछौं।’
उनका अनुसार यस आइडियालाई पहिलो पटक भुसावल डिभिजनले आयोजना गरेको बैठकमा प्रस्ताव गरिएको थियो। हाल एटीएम एसी डिब्बामा राखिएको भए पनि पञ्चवटी एक्सप्रेसका सबै २२ डिब्बा आपसमा वेस्टिबुलमार्फत जोडिएका हुनाले सबै यात्रुहरूले यो सुविधा प्रयोग गर्न सक्नेछन्। यात्रुले नगद झिक्नका साथै चेकबुक अर्डर गर्न र खाताको विवरण हेर्न पनि एटीएम प्रयोग गर्न सक्नेछन्।
विशेष कुरा के छ भने यही एटीएम मुम्बई–हिंगोली जनशताब्दी एक्सप्रेसका यात्रुहरूका लागि पनि उपलब्ध हुनेछ, किनभने यस रेलले पञ्चवटी एक्सप्रेससँग एउटै रेल साझा गर्छ। यसको अर्थ, लामो दूरीका यात्रुहरू पनि यो सेवा उपयोग गर्न सक्नेछन्।
