बैंकिङ खबर/ जापानको सेभेन बैंकले देशभरका २६ हजार अटोमेटेड टेलर मेसिनमा फेसियल रिकग्निसन टेक्नोलोजी प्रयोग गरी आफ्ना खातावालाहरूलाई नगद जम्मा गर्न र झिक्न दिने सेवा ल्याएको छ ।
फेस क्यास नामको नयाँ सेवाले सेभेन बैंक वा सिजुओका बैंकका निक्षेपकर्ताहरूलाई सेभेन बैंकका एटीएममा नगद कार्ड वा स्मार्टफोन बिना नै जम्मा गर्न र झिक्न सकिने छ ।
एनइसीको फेसियल रिकग्निसन टेक्नोलोजी प्रयोग गरेर, निक्षेपकर्ताहरूले आफ्नो पहिलो प्रयोगमा अनुहार जानकारी दर्ता गरेपछि पासवर्ड र कोड नम्बर प्रविष्ट गरेर मात्र आफ्नो पैसा सार्न सक्छन्।
सेभेन बैंक र एनईसीले संयुक्त रूपमा विकास गरेको सुरक्षा उपायहरूद्वारा सुरक्षित गरिएको नयाँ सेवाले पहिचान चोरीबाट हुने अनाधिकृत प्रयोगलगायत जोखिमहरू कम गर्ने अपेक्षा राखिएको छ ।
सेभेन बैंकले अन्य बैंकका खाताहरूमा फेस क्यासको प्रयोग बढाउने लक्ष्य राखेको छ। यो प्रविधि एकदमै सुरक्षित र भरपर्दो भएको समेत बैंकको दाबी छ ।
सेभेन बैंकको माउ कम्पनी सेभेन एण्ड होल्डिङ्स् कम्पनी हो । यसको मुख्यालय जापानको चियोडा सिटीमा रहेको छ । यसको स्थापना १० अप्रिल २००१ मा भएको थियो ।
