बैंकिङ खबर / बैंकिङ प्रणालीमा रहेको अधिक तरलता व्यवस्थापन गर्न नेपाल राष्ट्र बैंकले ३ महिनाका लागि २० अर्ब रुपैयाँ संकलन गर्ने भएको छ । यसका लागि केन्द्रीय बैंकले निक्षेप संकलन उपकरणमार्फत बोलकबोल आह्वान गरेको हो ।
राष्ट्र बैंकले बैंकिङ प्रणालीमा रहेको अतिरिक्त तरलता खिचेर बजारमा ब्याजदर तथा तरलताको अवस्था व्यवस्थित गर्न यस्तो उपकरण प्रयोग गर्दै आएको छ । पछिल्लो समय पनि केन्द्रीय बैंकले विभिन्न अवधिका निक्षेप संकलन उपकरणमार्फत ठूलो रकम बजारबाट खिच्दै आएको छ ।
निक्षेप संकलनमा ‘क’, ‘ख’ र ‘ग’ वर्गका इजाजतपत्रप्राप्त बैंक तथा वित्तीय संस्थाले सहभागी हुन पाउनेछन् । बोलकबोलबाट ब्याजदर निर्धारण हुनेछ ।राष्ट्र बैंकले यसअघि पनि एक महिना, दुई महिना, तीन महिना तथा अन्य अवधिका निक्षेप संकलन उपकरण प्रयोग गर्दै आएको छ । यसले बैंकिङ प्रणालीमा थुप्रिएको रकमलाई केन्द्रीय बैंकमा तान्दै बजारमा तरलताको मात्रा व्यवस्थापन गर्न सहयोग गर्छ ।
अधिक तरलता लामो समय कायम रहँदा अन्तरबैंक ब्याजदर तथा निक्षेप–कर्जा बजारमा समेत प्रभाव पर्न सक्ने भएकाले राष्ट्र बैंकले खुला बजार कारोबारमार्फत तरलता व्यवस्थापन गर्दै आएको छ ।
