बैंकिङ खबर / नेपाल एसबीआई बैंक लिमिटेडले भोटेकोशी नदीमा आएको भीषण बाढीबाट प्रभावित स्थानीय बासिन्दाका लागि राहत सहयोग उपलब्ध गराएको छ । बाढीका कारण जनजीवन प्रभावित भई आवास, खाद्यान्न तथा दैनिक उपभोगका आवश्यक सामग्रीको अभाव झेलिरहेका प्रभावित परिवारलाई लक्षित गर्दै बैंकले मानवीय सहायता प्रदान गरेको हो ।
प्राकृतिक विपद्का कारण प्रभावित समुदायलाई तत्काल राहत तथा आवश्यक सहयोग उपलब्ध गराउने उद्देश्यले बैंकले आफ्नो संस्थागत सामाजिक उत्तरदायित्वअन्तर्गत उक्त सहयोग गरेको जनाएको छ। विपद्को कठिन परिस्थितिमा प्रभावित परिवारलाई आवश्यक सामग्री तथा सहयोग उपलब्ध गराउँदा उनीहरूको दैनिक जीवनयापनमा केही सहजता पुग्ने बैंकको विश्वास छ ।
भोटेकोशी क्षेत्रमा आएको बाढीले स्थानीय पूर्वाधार तथा जनजीवनमा समेत असर पुर्याएको अवस्थामा विभिन्न सरकारी निकाय, संघसंस्था तथा निजी क्षेत्रबाट राहत तथा पुनःस्थापनाका प्रयास भइरहेका छन् । सोही क्रममा नेपाल एसबीआई बैंकले पनि प्रभावित समुदायप्रति आफ्नो सामाजिक दायित्व निर्वाह गर्दै राहत अभियानमा सहयोग पुर्याएको हो ।
बैंकले व्यवसायिक गतिविधिसँगै सामाजिक उत्तरदायित्वलाई समेत प्राथमिकतामा राख्दै विपद्, शिक्षा, स्वास्थ्य तथा समुदाय केन्द्रित विभिन्न क्षेत्रमा सहयोग गर्दै आएको जनाएको छ । बैंकका अनुसार संकटको समयमा प्रभावित समुदायसँग सहकार्य गर्नु वित्तीय संस्थाको सामाजिक जिम्मेवारीको महत्वपूर्ण पक्ष हो ।
भोटेकोशी बाढीबाट प्रभावित परिवारलाई लक्षित बैंकको यो सहयोगले तत्कालीन राहत व्यवस्थापनमा योगदान पुग्ने अपेक्षा गरिएको छ । साथै, विपद्का समयमा निजी क्षेत्रबाट हुने यस्ता सहयोगले प्रभावित समुदायको राहत तथा पुनःस्थापनाका प्रयासलाई थप बल पुग्ने देखिन्छ ।
