बैंकिङ खबर / एसियाली बजारहरूमा लगानीकर्ताहरूको मानसिकता तीव्र रूपमा बदलिएको छ। बैंक अफ अमेरिकाको पछिल्लो फन्ड म्यानेजर सर्वेक्षणअनुसार लगातार केही समय सुधार देखिएको विश्वव्यापी वृद्धिको अपेक्षा फेरि घटेको छ। अमेरिकाको सुस्तिँदो श्रम बजार, कमजोर उपभोग, र विशेषगरी एसियाली अर्थतन्त्रहरूमा असर पार्ने भन्सार शुल्कबारे बढ्दो चिन्ता यस गिरावटको प्रमुख कारण मानिएको छ। सर्वेक्षणमा सहभागी ४१ प्रतिशतले विश्व अर्थतन्त्र कमजोर हुने अपेक्षा गरेका छन् । त्यस्तै, ३१ प्रतिशतले एसियाको वृद्धिदर घट्ने अनुमान गरेका छन् । १० मध्ये ९ जना लगानीकर्ताले जापानबाहेक एसियाली इक्विटीहरू आगामी वर्षमा बढ्ने विश्वास राखेका छन्। आम्दानी वृद्धिका पूर्वानुमानहरू पनि बलिया देखिएका छन्, किनकि सहमति अनुमानहरूलाई अत्यधिक महत्त्वाकांक्षी मानिएको छैन।
सबैभन्दा ठूलो परिवर्तन भारतमा देखिएको छ। एसियाली इक्विटी बजारहरूमध्ये भघारत सबैभन्दा शीर्ष रोजाइमा रहँदै आएको छ । तथापी अमेरिकाले भने भारतलाई रोजाईको देशका रुपमा राखेको छैन । अमेरिकी राष्ट्रपति डोनल्ड ट्रम्पद्वारा भारतीय सामानहरूमा ५० प्रतिशत आयात शुल्क लगाउने घोषणा गरेका कारण पनि भारतलाई केही समस्या भएको छ । भारतले रुसबाट तेल आयात गरेको कारण अमेरिकासँगको सम्बन्धमा चिसोपना आएको हो । यसले कम्पनीहरूको आम्दानीमा चोट पुर्याउने र पहिले नै उच्च रहेको बजार मूल्यांकनलाई थप दबाबमा पार्ने लगानीकर्ताहरूको आशंका छ। नवीनतम सर्वेक्षणअनुसार, अन्य एसियाली बजारको तुलनामा अहिले ३० प्रतिशत फन्ड म्यानेजरहरूले भारतमा लगानी गरेका छन्।
उता, जापान अझै पनि यस क्षेत्रको सबैभन्दा आकर्षक गन्तव्य बनेको छ। त्यहाँ ४३ प्रतिशत लगानी छ। हाल चलिरहेका कम्पनीमा सुधार आउनु अनुकूल मुद्रा परिस्थिति सृजना हुनु र २०२६ सम्ममा जापान बैंकले ब्याजदर वृद्धि गर्ने अपेक्षाले थप बल दिएको छ।
ताइवान र कोरियालाई पछि पार्दै चीन दोस्रो स्थानमा उक्लिएको छ। यसको आर्थिक वृद्धिको दृष्टिकोण पाँच महिनाको उच्चतम बिन्दुमा पुगेको छ। अहिले ३ प्रतिशत मात्र म्यानेजरहरूले चीनमा कमजोर वृद्धि हुने अपेक्षा गरेका छन्, जुन गत महिनाको १० प्रतिशतभन्दा कम हो।
बेइजिङले अझ राम्रा नीति ल्याउने, र दीर्घकालीन मन्दीलाई नियन्त्रण गर्न घरपरिवारले कीर्तिमान उच्च बचतलाई उपभोग तथा लगानीमा प्रयोग गर्ने सम्भावनाले यो आशावादलाई बल दिएको छ। तर, दीर्घकालीन दृष्टिकोणमा सावधानी कायम छ—६० प्रतिशतले चिनियाँ इक्विटीहरूको संरचनात्मक मूल्यह्रास हुने भविष्यवाणी गरेका छन्।
सर्वेक्षणले जापानबाहेक एसियामा वृद्धिमुखी विषयहरूमा स्पष्ट प्राथमिकता देखाएको छ। फन्ड म्यानेजरहरूले प्रविधि हार्डवेयर, सेमीकन्डक्टर, सफ्टवेयर र वित्तीय सेवाजस्ता क्षेत्रमा बढी लगानी गरिरहेका छन् भने धातु, गाडी, ऊर्जा र रियल इस्टेटमा लगानी घटाइरहेका छन् । चीनमा कृत्रिम बुद्धिमत्ता अझै मुख्य रोजाइमा छ। भारतमा अपेक्षा घटे पनि पूर्वाधार र उपभोगसम्बन्धी लगानीमा ध्यान केन्द्रित भइरहेको छ। जापानमा उच्च ब्याजदरबाट लाभ लिने बैंकहरू र सेमीकन्डक्टर कम्पनीहरूमा लगानीकर्ताको बढी आकर्षण देखिएको छ।
लगानीका लागि एशियामा उपयुक्त मानिएका देशहरु :
सिंगापुर : व्यवसायिक अनुकूल वातावरण, कम कर दर, र उच्च आर्थिक वृद्धि दर
हङकङ : मुक्त अर्थव्यवस्था, कम कर दर, र उच्च आर्थिक वृद्धि दर
दक्षिण कोरिया : उच्च आर्थिक वृद्धि दर, उन्नत प्रविधि, र व्यवसायिक अनुकूल वातावरण
भारत : ठूलो बजार, उच्च आर्थिक वृद्धि दर, र व्यवसायिक अनुकूल वातावरण
