बैंकिङ खबर / एनआईसी एशिया बैंकले चालु आर्थिक वर्ष २०८३/८४ को पहिलो त्रैमासमा १२ करोड ७४ लाख रुपैयाँ खुद नाफा कमाएको छ । गत आर्थिक वर्षको सोही अवधिमा १२ करोड २२ लाख रुपैयाँ नाफा गरेको बैंकको खुद नाफा यस वर्ष ४.३२ प्रतिशतले बढेको हो । तर, नाफामा सामान्य सुधार देखिए पनि बैंकको मुख्य ब्याज आम्दानी घटेको छ भने खराब कर्जा अनुपात बढेर ९.८१ प्रतिशत पुगेको छ ।
बैंकले सार्वजनिक गरेको अपरिष्कृत वित्तीय विवरणअनुसार सहायक कम्पनीसहितको समग्र समूहको खुद नाफा भने उल्लेख्य बढेको छ । गत वर्षको पहिलो त्रैमासमा १५ करोड ७२ लाख रुपैयाँ रहेको समूहको नाफा चालु आर्थिक वर्षमा बढेर २६ करोड ७२ लाख रुपैयाँ पुगेको छ । यसरी बैंक एक्लैको नाफा वृद्धिदर सामान्य रहे पनि समूहको नाफामा भने करिब ७० प्रतिशत वृद्धि देखिएको छ ।
बैंकको आम्दानी संरचनामा भने दबाब देखिएको छ । समीक्षा अवधिमा खुद ब्याज आम्दानी १७.३६ प्रतिशतले घटेर १ अर्ब ८८ करोड ९३ लाख रुपैयाँमा सीमित भएको छ । गत वर्षको सोही अवधिमा बैंकले २ अर्ब २८ करोड ६० लाख रुपैयाँ खुद ब्याज आम्दानी गरेको थियो । कोषको लागत ४.६० प्रतिशतबाट घटेर ३.७८ प्रतिशतमा आए पनि ब्याजदर अन्तर ३.९९ प्रतिशतबाट खुम्चिएर ३.३१ प्रतिशतमा झरेको छ ।
खुद शुल्क तथा कमिसन आम्दानीमा भने सुधार देखिएको छ । यस्तो आम्दानी ५.३२ प्रतिशतले बढेर ३५ करोड ६ लाख रुपैयाँ पुगेको छ । तर, ब्याज आम्दानीमा आएको गिरावट पूर्ति गर्न यो वृद्धि पर्याप्त हुन सकेन । फलस्वरूप बैंकको कुल सञ्चालन आम्दानी २ अर्ब ७७ करोड ९१ लाख रुपैयाँबाट घटेर २ अर्ब ४२ करोड ६८ लाख रुपैयाँमा सीमित भएको छ ।
आम्दानी घटे पनि कर्जा तथा अन्य सम्भावित नोक्सानीका लागि छुट्याइएको रकम कम हुँदा खुद नाफामा केही राहत मिलेको छ । गत वर्षको पहिलो त्रैमासमा १ अर्ब १८ करोड ६५ लाख रुपैयाँ रहेको इम्पेयरमेन्ट चार्ज यस वर्ष २१.६६ प्रतिशतले घटेर ९२ करोड ९४ लाख रुपैयाँमा आएको छ । अन्य सञ्चालन खर्च तथा ह्रासकट्टी खर्चमा समेत कमी आएको छ । यद्यपि, बैंकको सञ्चालन नाफा १९ करोड ३५ लाख रुपैयाँबाट घटेर १६ करोड १४ लाख रुपैयाँमा सीमित भएको छ ।
बैंकको कर्जा गुणस्तरमा भने चुनौती थपिएको छ । गत वर्षको पहिलो त्रैमासमा ६.९९ प्रतिशत रहेको कुल निष्क्रिय कर्जा अनुपात यस वर्ष बढेर ९.८१ प्रतिशत पुगेको छ । एक वर्षमै २.८२ प्रतिशत बिन्दुले बढेको खराब कर्जाले बैंकको कर्जा असुली तथा जोखिम व्यवस्थापनमा दबाब रहेको संकेत गर्छ ।
तर, खुद निष्क्रिय कर्जा अनुपात भने १.७४ प्रतिशतबाट घटेर ०.३६ प्रतिशतमा आएको छ । त्यस्तै, खराब कर्जाको तुलनामा कायम गरिएको कर्जा नोक्सानी व्यवस्थाको अनुपात ९४.८३ प्रतिशतबाट बढेर ११४.८४ प्रतिशत पुगेको छ । यी सूचकले कर्जा जोखिमविरुद्धको सुरक्षण व्यवस्थामा सुधार देखाए पनि कुल खराब कर्जाको बढ्दो अनुपातलाई बेवास्ता गर्न मिल्ने अवस्था छैन ।
बैंकको वितरणयोग्य नाफा पनि ठूलो घाटामा रहेको छ । असोज मसान्तसम्मको विवरणअनुसार वितरणयोग्य घाटा १५ अर्ब ३९ करोड ६९ लाख रुपैयाँ पुगेको छ । गत वर्षको सोही अवधिमा यस्तो घाटा ६ अर्ब २४ करोड ८२ लाख रुपैयाँ थियो । यद्यपि, परिपक्व ऋणपत्रसँग सम्बन्धित ६ अर्ब ७७ करोड रुपैयाँको ऋणपत्र मोचन सञ्चिति पूँजी समायोजन सञ्चितिमा सारिएको समायोजनपछि वितरणयोग्य घाटा करिब ८ अर्ब ६२ करोड रुपैयाँ हुने बैंकले उल्लेख गरेको छ ।
चालु त्रैमासमा थपिएको वितरणयोग्य घाटा भने अघिल्लो वर्षको तुलनामा घटेको छ । गत वर्षको पहिलो त्रैमासमा १ अर्ब ३ करोड ६४ लाख रुपैयाँ रहेको यस्तो घाटा यस वर्ष ५३ करोड १९ लाख रुपैयाँमा सीमित भएको छ । तर, सञ्चित वितरणयोग्य घाटा अझै ठूलो रहेकाले बैंकको लाभांश वितरण क्षमतामा दबाब कायमै छ ।
पूँजीको अवस्थासमेत कमजोर बनेको देखिन्छ । बैंकको कुल पूँजीकोष अनुपात १४.०३ प्रतिशतबाट घटेर ११.१२ प्रतिशतमा आएको छ । प्राथमिक पूँजी अनुपात पनि ९.०३ प्रतिशतबाट घटेर ६.२७ प्रतिशत कायम भएको छ । त्यस्तै, कर्जा-निक्षेप अनुपात ६६.०८ प्रतिशतबाट घटेर ६०.२२ प्रतिशतमा झरेको छ ।
बैंकको वार्षिकीकरण गरिएको प्रतिसेयर आम्दानी भने ३ रुपैयाँ २१ पैसाबाट बढेर ३ रुपैयाँ ३५ पैसा पुगेको छ । असार मसान्तको तुलनामा ग्राहक कर्जाको वासलातमा देखिएको रकम करिब ८१ करोड रुपैयाँ घटेर १ खर्ब ९१ अर्ब २० करोड रुपैयाँ कायम भएको छ ।
समग्रमा एनआईसी एशिया बैंकको पहिलो त्रैमासिक वित्तीय विवरणले खुद नाफामा सामान्य वृद्धि देखाए पनि ब्याज आम्दानी, खराब कर्जा र पूँजीकोषमा चुनौती कायम रहेको देखाउँछ । कर्जा असुलीमा सुधार ल्याउँदै मुख्य बैंकिङ आम्दानीलाई पुनः वृद्धि गर्न सक्नु आगामी दिनमा बैंकको वित्तीय अवस्थाका लागि महत्वपूर्ण हुनेछ ।
