बैंकिङ खबर / पूर्वप्रधानन्यायाधीश चोलेन्द्रशमशेर जबरा आइतबार बिहान प्रहरी नियन्त्रणमा परेका छन् । काठमाडौं उपत्यका अपराध अनुसन्धान कार्यालयको टोलीले उनलाई महाराजगञ्जस्थित निवासबाट नियन्त्रणमा लिएर कार्यालयमा लगेको हो ।
प्रहरी टोली बिहान करिब ३ बजे जबराको निवास पुगेको थियो। त्यसपछि उनलाई सुरक्षा चुनौती रहेको भन्दै प्रहरी कार्यालयमा ल्याइएको बताइएको छ । यद्यपि, सुरुवाती चरणमा प्रहरीले उनलाई कुन विषयमा नियन्त्रणमा लिइएको हो भन्ने स्पष्ट विवरण सार्वजनिक गरेको थिएन ।
प्रहरी अधिकारीहरूका अनुसार जबरासँग सम्बन्धित विषयमा उजुरी परेको छ । तर, उजुरीको प्रकृति, आरोप तथा त्यसका आधारमा अघि बढाइने कानुनी प्रक्रियाबारे विस्तृत जानकारी भने सार्वजनिक गरिएको छैन ।
उपत्यका अपराध अनुसन्धान कार्यालयका अधिकारीले जबरालाई तत्काल कुनै मुद्दामा थुनामा राख्ने उद्देश्य नरहेको बताएका छन्। उनका अनुसार सुरक्षा अवस्थालाई ध्यानमा राखेर उनलाई कार्यालयमा ल्याइएको हो ।
पूर्वप्रधानन्यायाधीशलाई रातको समयमा निवासबाट नियन्त्रणमा लिइएको विषयले भने कानुनी प्रक्रिया र सुरक्षा व्यवस्थापनबारे प्रश्न उठाएको छ। पूर्वन्यायाधीश तथा पूर्वप्रहरी अधिकारीहरूले सुरक्षा जोखिम भए निवासमै थप सुरक्षा उपलब्ध गराउन सकिने र नियन्त्रणमा लिनुपर्ने अवस्था भए त्यसको कानुनी आधार स्पष्ट हुनुपर्ने धारणा व्यक्त गरेका छन् ।
चोलेन्द्रशमशेर जबरा सर्वोच्च अदालतका २९औँ प्रधानन्यायाधीश हुन् । उनले २०७५ पुसदेखि सर्वोच्च अदालतको नेतृत्व गरेका थिए। उनको कार्यकालमा न्यायपालिकासम्बन्धी विभिन्न विवाद सार्वजनिक भएका थिए ।
२०७८ फागुनमा उनीविरुद्ध प्रतिनिधिसभामा महाभियोग प्रस्ताव दर्ता भएको थियो । प्रस्ताव दर्तापछि उनी प्रधानन्यायाधीशको जिम्मेवारीबाट निलम्बित भएका थिए । महाभियोग प्रक्रिया टुंगोमा नपुग्दै उनले २०७९ मंसिरमा उमेरहदका कारण अवकाश पाएका थिए ।
जबराविरुद्धको महाभियोगसँग सम्बन्धित विषयमा हालै सर्वोच्च अदालतको संवैधानिक इजलासबाट समेत फैसला आएको थियो। त्यसपछि केही दिनमै उनी प्रहरी नियन्त्रणमा परेका हुन् ।
जबरालाई नियन्त्रणमा लिनुको वास्तविक कारण, उनीविरुद्ध परेको भनिएको उजुरीको विषय र अब प्रहरीले अघि बढाउने प्रक्रियाबारे सम्बन्धित निकायबाट थप आधिकारिक विवरण आउन बाँकी छ ।
