बैंकिङ खबर/ बैंकिङ कसुर मुद्दामा फरार रहेकी ५० वर्षीया तेजुमाया गुरूङलाई प्रहरीले पक्राउ गरेको छ। गुरूङ काठमाडौँ महानगरपालिका–४ सुकेधारा क्षेत्रमा बसोबास गर्दै आइरहेकी थिइन् र इलाम सन्दकपुर गाउँपालिका–२ माईमाजुवा घर भएकी छन्। उच्च अदालत पाटनको २०७९ साउन १७ गतेको फैसलाअनुसार, तेजुमाया गुरूङलाई रु ३ लाख ५० हजार जरिवाना, तीन दिनको कैद र रु १६ हजार क्षतिपूर्तिका रूपमा पीडित राहत कोषमा बुझाउनुपर्ने सजाय तोकिएको थियो। उक्त फैसलापछि गुरूङ फरार थिइन्।
शुक्रबार काठमाडौँ उपत्यका अपराध अनुसन्धान कार्यालय टेकुबाट खटिएको प्रहरी टोलीले उनलाई काठमाडौँको सुकेधारा क्षेत्रबाट पक्राउ गरेको हो। प्रहरीले गुरूङलाई पक्राउ गरी आवश्यक अनुसन्धान र कानूनी प्रक्रिया अघि बढाएको जनाएको छ।
