बैंकिङ खबर / भोटेकोशी नदीमा आएको भीषण बाढीका कारण एन आई सी एशिया बैंकका रसुवा र नुवाकोट जिल्लामा रहेका तीनवटा शाखा कार्यालय पूर्णरूपमा क्षतिग्रस्त भएका छन् । २०८३ भदौ १० गते आएको अकल्पनीय बाढीका कारण बैंकका शाखा कार्यालय तथा आसपासका क्षेत्रमा ठूलो भौतिक क्षति भएको बैंकले जनाएको छ ।
बैंकका अनुसार बाढीका कारण रसुवा जिल्लास्थित स्याफ्रुबेशी शाखा र नुवाकोट जिल्लास्थित बेत्रावती शाखा कार्यालय रहेको भवन नै बाढीले बगाएको छ । त्यस्तै, नुवाकोटकै त्रिशुली शाखा कार्यालय पनि पूर्णरूपमा क्षतिग्रस्त भई माटोले पुरिएको अवस्थामा रहेको छ । तीनवटै शाखा कार्यालयमा ठूलो क्षति पुगेपछि अर्को व्यवस्था नभएसम्मका लागि शाखाहरू बन्द रहने बैंकले जानकारी दिएको छ । शाखा बन्द भएपछि सम्बन्धित सेवाग्राहीलाई बैंकिङ सेवा प्राप्त गर्न वैकल्पिक व्यवस्था तथा बैंकले उपलब्ध गराउने अन्य माध्यम प्रयोग गर्नुपर्ने अवस्था सिर्जना भएको छ ।
कर्मचारीहरू सुरक्षित, आवश्यक परे हेलिकोप्टरबाट उद्धारको तयारी बाढीबाट शाखा कार्यालयहरूमा ठूलो क्षति पुगे पनि प्रभावित क्षेत्रमा कार्यरत बैंकका सबै कर्मचारीहरू सुरक्षित स्थानमा रहेको बैंकले जनाएको छ । कर्मचारीहरूको सुरक्षालाई प्राथमिकतामा राख्दै बैंकले आवश्यक अवस्था आएमा कर्मचारी तथा उनीहरूका परिवारका सदस्यलाई समेत हेलिकोप्टरमार्फत सुरक्षित स्थानमा स्थानान्तरण गर्ने तयारी अवस्थामा रहेको जनाएको छ ।
अचानक आएको बाढीका कारण प्रभावित क्षेत्रमा यातायात तथा आवागमनमा समेत कठिनाइ उत्पन्न भएको अवस्थामा कर्मचारीहरूको उद्धार तथा सुरक्षित स्थानान्तरणका लागि बैंकले आवश्यक समन्वय गरिरहेको जनाएको छ। मानवीय तथा भौतिक क्षतिप्रति बैंकद्वारा दुःख व्यक्त भोटेकोशी नदीमा आएको भीषण बाढीबाट भएको ठूलो जनधनको क्षतिप्रति एन आई सी एशिया बैंकले गहिरो दुःख व्यक्त गरेको छ। बैंकले बाढी तथा त्यसबाट उत्पन्न विपद्का क्रममा ज्यान गुमाएका सम्पूर्णप्रति हार्दिक श्रद्धाञ्जली अर्पण गर्दै शोकसन्तप्त परिवारजनप्रति समवेदना व्यक्त गरेको छ ।
त्यसैगरी, बाढीका कारण हालसम्म सम्पर्कमा आउन नसकेका नागरिकहरूको सकुशल तथा शीघ्र उद्धारको कामना गर्दै बैंकले घटनामा परी घाइते भएकाहरूको शीघ्र स्वास्थ्यलाभको कामना गरेको छ । भोटेकोशीमा आएको बाढीले प्रभावित क्षेत्रको जनजीवनमा समेत गम्भीर असर पारेको छ। बैंकका शाखा कार्यालयहरूमा भएको क्षतिले विपद्का बेला वित्तीय संस्थाका भौतिक संरचना र सेवा प्रवाहमा पर्न सक्ने जोखिमलाई समेत उजागर गरेको छ ।
एन आई सी एशिया बैंकले प्रभावित शाखाहरूको अवस्था तथा सेवा पुनः सञ्चालनका विषयमा आवश्यक निर्णय गरी वैकल्पिक व्यवस्था गर्ने जनाएको छ। हालका लागि भने पूर्णरूपमा क्षति भएका स्याफ्रुबेशी, बेत्रावती र त्रिशुली शाखा अर्को व्यवस्था नभएसम्म बन्द रहने बैंकले स्पष्ट पारेको छ ।
