बैंकिङ खबर/ नेपाली बैंकिङ क्षेत्रको विश्वसनीयता र अन्तर्राष्ट्रिय प्रतिस्पर्धात्मक क्षमतालाई थप उचाइमा पुर्याउँदै महालक्ष्मी विकास बैंकले लगातार दोस्रो वर्ष अन्तर्राष्ट्रिय स्तरको प्रतिष्ठित सम्मान प्राप्त गरेको छ। भारतको इन्डियन चेम्बर अफ कमर्स (ICC) ले आयोजना गरेको ‘चौथो इमर्जिङ एसिया बैंकिङ कनक्लेभ एण्ड अवार्ड्स–२०२६’ मा बैंक ‘राइजिङ स्टार–ग्रोथ’ विधाबाट सम्मानित भएको हो। यस उपलब्धिले बैंकको व्यवसायिक विस्तार, डिजिटल रूपान्तरण र जिम्मेवार बैंकिङ अभ्यासलाई अन्तर्राष्ट्रिय समुदायले समेत स्वीकार गरेको संकेत दिएको छ। नयाँ दिल्लीमा आयोजित उक्त कार्यक्रममा नेपालसहित भारत, भुटान, बंगलादेश, म्यानमारलगायत बिमस्टेक क्षेत्रका बैंक तथा वित्तीय संस्थाहरूको उल्लेखनीय सहभागिता रहेको थियो। विभिन्न विधामा उत्कृष्ट कार्यसम्पादन गर्ने बैंकहरूलाई सम्मान गरिएको कार्यक्रममा महालक्ष्मी विकास बैंकले तीव्र व्यवसायिक वृद्धि, ग्राहककेन्द्रित सेवा, वित्तीय पहुँच विस्तार र प्रविधिमैत्री बैंकिङ अभ्यासका आधारमा यो प्रतिष्ठित अवार्ड आफ्नो नाममा पार्न सफल भएको हो।
बैंकले पछिल्ला वर्षहरूमा डिजिटल बैंकिङलाई प्राथमिकतामा राख्दै सेवामा व्यापक सुधार गरेको छ। मोबाइल बैंकिङ, इन्टरनेट बैंकिङ, डिजिटल भुक्तानी प्रणाली तथा आधुनिक प्रविधिमा आधारित सेवाको विस्तारसँगै बैंकले ग्राहकलाई सुरक्षित, छरितो र सहज बैंकिङ अनुभव प्रदान गर्दै आएको छ। यिनै प्रयासहरूको अन्तर्राष्ट्रिय मूल्याङ्कनस्वरूप बैंकले ‘राइजिङ स्टार–ग्रोथ’ सम्मान प्राप्त गरेको जनाएको छ। यो उपलब्धि महालक्ष्मी विकास बैंकका लागि पहिलो अन्तर्राष्ट्रिय सम्मान भने होइन। गत वर्ष पनि बैंकले ‘एसेट क्वालिटी विधामा इन्डियन चेम्बर अफ कमर्सबाट सम्मान प्राप्त गरेको थियो। लगातार दोस्रो वर्ष फरक–फरक विधामा सम्मानित हुनुले बैंकको संस्थागत सुदृढता, जोखिम व्यवस्थापन क्षमता, वित्तीय अनुशासन तथा दीर्घकालीन विकास रणनीति प्रभावकारी रहेको पुष्टि भएको विश्लेषण गरिएको छ। बैंकले आफ्नो सेवा विस्तारसँगै वित्तीय समावेशीकरणलाई पनि प्राथमिकतामा राख्दै आएको छ। ग्रामीण तथा सहरी क्षेत्रका ग्राहकसम्म आधुनिक बैंकिङ सेवा पुर्याउने, नवीन वित्तीय उत्पादन विकास गर्ने तथा उत्तरदायी बैंकिङ अभ्यासलाई संस्थागत संस्कृतिका रूपमा अघि बढाउने प्रयासले बैंकको बजार विस्तारमा महत्वपूर्ण योगदान दिएको छ। यही रणनीतिले अन्तर्राष्ट्रिय मञ्चमा समेत बैंकको पहिचान मजबुत बनाउन सहयोग पुगेको बैंकको विश्वास छ। ‘सबल बैंक, सफल सहकार्य’ भन्ने मूल नारालाई आत्मसात् गर्दै अघि बढिरहेको महालक्ष्मी विकास बैंकले हालै काठमाडौंको ज्ञानेश्वरमा कफी लाउञ्जसहितको डिजिटल हब सञ्चालनमा ल्याएको छ। बैंकका अनुसार उक्त डिजिटल हब केवल शाखा सेवा मात्र नभई ग्राहकलाई आधुनिक डिजिटल बैंकिङ अनुभव प्रदान गर्ने नयाँ अवधारणाको केन्द्रका रूपमा विकास गरिएको हो। यसमार्फत ग्राहकहरूले डिजिटल माध्यमबाट विभिन्न बैंकिङ सेवा सहज रूपमा प्राप्त गर्न सक्नेछन्।
बैंकले पछिल्ला वर्षहरूमा प्रविधिमैत्री सेवा विस्तारसँगै ग्राहकको विश्वासलाई प्राथमिकतामा राख्दै सेवा गुणस्तर सुधार, वित्तीय पहुँच विस्तार, डिजिटल सुरक्षा तथा नवप्रवर्तनमा निरन्तर लगानी गर्दै आएको छ। अन्तर्राष्ट्रिय अवार्डले ती प्रयासहरूको औपचारिक मान्यता दिएको बैंकको भनाइ छ। बैंकिङ क्षेत्रका जानकारहरूका अनुसार अन्तर्राष्ट्रिय संस्थाबाट प्राप्त यस्ता सम्मानले सम्बन्धित बैंकको प्रतिष्ठा मात्र बढाउँदैन, सम्पूर्ण नेपाली बैंकिङ उद्योगको विश्वसनीयता र प्रतिस्पर्धात्मक क्षमतासमेत अन्तर्राष्ट्रिय बजारमा स्थापित गर्न सहयोग पुर्याउँछ। विशेषगरी डिजिटल बैंकिङ, वित्तीय समावेशीकरण र ग्राहकमैत्री सेवामा नेपाली बैंकहरूले गरेको प्रगति विश्व समुदायसमक्ष प्रस्तुत हुने अवसरका रूपमा पनि यस्ता उपलब्धिलाई हेरिएको छ। महालक्ष्मी विकास बैंकले आगामी दिनमा पनि प्रविधिमा आधारित सुरक्षित बैंकिङ सेवा, नवीन वित्तीय समाधान, उत्तरदायी बैंकिङ अभ्यास तथा ग्राहककेन्द्रित सेवामार्फत आफ्नो अन्तर्राष्ट्रिय पहिचानलाई अझ सुदृढ बनाउने प्रतिबद्धता व्यक्त गरेको छ। लगातार दोस्रो वर्ष प्राप्त अन्तर्राष्ट्रिय सम्मानले बैंकको आगामी यात्रालाई थप आत्मविश्वासी बनाउनुका साथै नेपाली बैंकिङ क्षेत्रलाई विश्वमञ्चमा थप प्रभावकारी रूपमा स्थापित गर्ने विश्वास गरिएको छ।
