बैंकिङ खबर/बैंकिङ कसूर मुद्दामा फरार रहेका दुई जना प्रतिवादीलाई प्रहरीले पक्राउ गरेको छ। पक्राउ पर्नेमा काभ्रेपलाञ्चोक चौरी देउराली गाउँपालिका–१ घर भई काठमाडौं महानगरपालिका–१५ स्वयम्भूमा बसोबास गर्ने ३३ वर्षीय सुकराम लामा तामाङ र सुर्खेतको लेकवेशी नगरपालिका–१ घर भई काठमाडौं बुढानिलकण्ठ नगरपालिका–६ बस्ने ३७ वर्षीय लक्ष्मी प्रसाद सापकोटा रहेका छन्।
काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले उच्च अदालत पाटनको २०८० असार १ गतेको फैसलाअनुसार १५ लाख रुपैयाँ जरिवाना, ५ दिन कैद र ६० हजार रुपैयाँ पीडित राहत कोषमा बुझाउनु पर्ने सजाय सुनाइएका सुकराम तामाङलाई काठमाडौं महानगरपालिका–८ स्थित गौशालाबाट मंगलबार पक्राउ गरेको हो।
यस्तै, सोही मुद्दामा जिल्ला अदालत काठमाडौंबाट पक्राउ पुर्जी जारी भई फरार रहेका लक्ष्मी प्रसाद सापकोटालाई प्रहरीले बुढानिलकण्ठ नगरपालिका–६ बाट नियन्त्रणमा लिएको हो।
प्रहरीका अनुसार सुकराम तामाङलाई फैसला कार्यान्वयनका लागि जिल्ला अदालत काठमाडौंमा पेश गरिएको छ भने सापकोटालाई थप अनुसन्धान तथा कारबाहीका लागि प्रहरी वृत्त बालाजु पठाइएको छ।
