एभरेष्ट बैंक लिमिटेडले अन्य कुनै बैंक तथा वित्तीय संस्थासँग मर्जर तथा एक्विजिसनमा जाने विशेष प्रस्ताव अघि सार्दै वैशाख २० गतेका लागि विशेष साधारणसभा डाकेको छ । यसअघि हकप्रद सेयर र बोनस सेयर जारी गरेरै आठ अर्ब चुक्तापुँजी पुर्याउने गर्न भनेर विशेष साधारण सभा बोलाएको छ । हकप्रद र बोनसका माध्यमबाट चुक्ता पुँजी पुर्याउने योजना बनाएको एभरेष्टले एकाएक मर्जर तथा एक्विजिसनको योजना अघि सारेको हो । बैंकले कुन संस्थासँग मर्जर वा एक्विजिसनमा जाने भनेर खुलाएको भने छैन । बैंकले ५१ प्रतिशतभन्दा बढी संस्थापक समूहको सेयरलाई सर्वसाधारण समूहमा परिणत गर्ने सम्बन्धी प्रस्ताव पनि विशेष साधारण सभामा लैजाँदैछ ।
विशेष साभारण सभाका लागि बैंकले वैशाख ११ गते बुक क्लोज गर्दैछ । जसअनुसार, वैशाख १० गतेसम्म कायम सेयरधनीले मात्रै एभरेष्ट बैंकको २० गतेको साधारणसभामा भाग लिन पाउनेछन् ।
हाल एभरेष्ट बैंकको चुक्तापुँजी चार अर्ब ६० करोड ६४ लाख रुपैयाँ रहेको छ । बैंकले हालै मात्र १० बराबर तीनको अनुपातमा हकप्रद सेयर निष्काशन गर्नका लागि नेपाल धितोपत्र बोर्डसँग अनुमति मागेको छ । बैंकले गत वर्षको कमाईबाट लगानीकर्तालाई ७० प्रतिशत बोनस सेयर दिएको छ । बैंकको प्रतिसेयर आम्दानी ४२ रुपैयाँ ९३ पैसा र प्रतिसेयर नेटवर्थ २०७ रुपैयाँ ७९ पैसा छ ।
