जनता बैंक नेपाल लिमिटेडले २१ हजार सात सय २६ कित्ता संस्थापक सेयर वैशाख १५ गतेदेखि लिलामीमा निकाल्ने भएको छ । बैंकले संस्थापक समूहको हकप्रद सेयरको लागि २०७३ चैत १ गतेदेखि १५ गतेसम्म बोलकबोलबाट विक्री खुला गरी आवेदन माग गरिएकोमा संस्थापक र सर्वसाधारण सेयर बाँडफाँड भई बाँकी रहेको संस्थापक समूहतर्फ २१ हजार सात सय २६ कित्ताको लागि शिलबन्दी बोलपत्र आह्वान गरेको हो ।
सेयरको न्यूनतम मूल्य प्रति सेयर एक सय रुपैयाँ तोकिएको छ । जसअनुसार, सेयरधनीले एक सय रुपैयाँ वा सोभन्दा बढी मूल्य अङ्कित गरी बोलकबोल गर्नुपर्ने छ । सेयर खरीदको लागि बोलकबोल गर्दा न्यूनतम सय कित्ता वा सो भन्दा १० ले भाग जाने सम्पूर्ण आवेदन दिन सकिनेछ । बैंकको सेयर निष्काशन तथा बिक्री प्रबन्धक एनसीएम मर्चेण्ट बैङकिङ लिमिटेड रहेको छ ।
सेयर लिलामी वैशाख २१ गते अपरान्ह ३ बजेसम्म खुला रहने छ । आवेदनमा प्राप्त बोलपत्रहरु छानबिन गरी वैशाख २६ गते बाँडफाँड गरिने बताइएको छ । बैंकले बाँडफाँडमा परेका आवेदकहरुलाई आवेदककै हितग्राही खातामा सेयर नामसारी गरिने भएकाले आवेदनमा हितग्राही खाता अनिवार्य रुपमा उल्लेख गर्न आग्रह गरेको छ । बाँडफाँटमा नपरेका आवेदकहरुको रकम फिर्ता भुक्तानी वैशाख २९ गते गर्ने बताइएको छ ।
