गत पुस १७ गतेदेखि सञ्चालनमा आएको मोबाइल कम्युनिकेशन्सको चौथो पुस्ता ‘फोरजी’ सेवा अब पोष्टपेड मोबाइलमा पनि उपलब्ध हुने भएको छ । हालसम्म नेपाल टेलिकमको प्रिपेड मोबाइलमा मात्र उपलब्ध गराएकोमा आगामी शनिबार अर्थात माघ २२ गतेदेखि प्रिपेड मोबाइलमा पनि फोरजी चलाउन पाइने भएको हो । नेपाल टेलिकमले सुरुवातमा काठमाडौँ उपत्यका र पोखराका लागि मात्रै यो सेवा गरेकाले तत्कालका लागि यो सेवा काठमाडौँ र पोखराका जीएसएम पोष्टपेडका तीन लाख ५० हजार ग्राहकले मात्र पाउनेछन् ।
त्यस्तै, टेलिकमले छिटै नै यो सेवालाई देशभर विस्तार गर्दैछ । फोरजी सेवा सुरु गरेको छोटो समयमा नै लोकप्रियता बढेको पाइएपछि छिटै नै मुलुकभर विस्तार गर्ने गरी गृहकार्य सुरु गरेको नेपाल टेलिकमले जनाएको छ ।
फोरजीका सुविधाहरु
उपभोक्ताले फोरजीबाट पाउने भनेकै फास्ट डेटा सर्भिस हो । नेपाल टेलिकमले सञ्चालनमा ल्याउने यो फोरजी सेवामा उपभोक्ताले सुरुवातमा ३२ दशमलब ४ एमविपिएस गतिमा इन्टरनेट चलाउन पाउने बताइएको छ । व्यवसायिक रुपमा सुरु गरेपछि यो गति ८० एमविपिएसमा पुग्नेछ ।
यसमा भिडियो डाउनलोडिङ र स्ट्रिमिङलगायत फास्ट हुन्छ । भिडियो च्याटिङ गर्न गाह्रो हुँदैन । ठूलो क्षमताका फाइलहरु अपलोड वा डाउनलोड गर्न सकिन्छ । इन्टरनेट स्पीडका कारण फेसबुक म्यासेन्जर, भाइबर, स्काइपजस्ता म्यासेजिङ एपहरुमा कुरा गर्दा आवाज नबुझिने समस्या पनि हुँदैन । त्यस्तै, म्युजिक, भिडियो, गेमलगायत विनारोकावट चलाउन सकिनेछ ।
कसरी गर्ने प्रयोग ?
फोरजी सेवामा मोबाइल वेब एक्सेस, आइपी टेलिफोनी, गेमिङ सर्भिस, हाई डेफिनेसन मोबाइल टिभी, भिडियो कन्फेरेन्सिङ, थ्रिडी टेलिभिजन, क्लाउड कम्प्युटिङ लगायतका सेवा प्राप्त गर्न सकिन्छ । भिडियो, भ्वाइस, तस्वीर, ग्राफिक्सलगायत उच्च गतिको इन्टरनेट चाहिँदा फोरजी प्रयोग गर्नुपर्छ भने सामान्य अवस्थामा थ्रिजी नै उपयुक्त हुन्छ ।
सुधारिएको स्पिडमा इन्टरनेट चलाउन र मोबाइल डाटामै लाइभ भिडियो हेर्न सकिने बताइएको फोरजी प्रयोग गर्न सर्वसाधारणले यसअघिको थ्रिजीभन्दा महँगो शुल्क तिर्नुपर्नेछ भने फोरजी सपोर्ट गर्ने मोबाइल, ट्याब्लेटलगायतका ह्यान्डसेट किन्नुपर्नेछ । फोरजीका लागि मोबाइल डिभाइसहरु पनि फोरजी सपोर्टेड हुनुपर्छ । यसअघि नेपाली बजारमा थ्रिजी नेटवर्क सपोर्ट गर्ने मोबाइल, ट्याब्लेट लगायतका डिभाइस भित्रिन्थे । तुलनात्मक रुपमा केही बढी शुल्क पर्ने फोरजी मोबाइलमा मात्रै यस्तो सेवा लिन सकिन्छ ।
फोरजीबाट भिडियो कललगायतका सेवा लिन सकिने भएपछि तुलनात्मक रुपमा यसको शुल्क बढी नै हुन्छ । अहिले नेपाल टेलिकम, एनसेलले भोलुमबेस्ड प्याकेजहरु पनि ल्याएका छन् । यो तुलनात्मक रुपमा महँगो छ । यसमा इन्टरनेशनल ब्यान्डविथ पनि गाँसिएको छ । यसमा लोकल स्पेक्टर्म र लाइसेन्सलगायतका कुरा पनि गाँसिन्छन् । भोलुम बढ्दै गयो भने प्राइस पनि स्वभावैले घट्छ ।
मनोरञ्जनका लागि प्रयोग नगर्नुस्
थ्रिजी सर्भिस नै महँगो मान्ने ग्राहकका लागि फोरजी अझ कठिनाइ बन्न सक्छ । शुल्क बढी लाग्ने कारण नेपालीहरुले आनाकानी नगरी फोरजी चलाउनेमा विश्वस्त हुन सकिँदैन । तर, विस्तारै फोरजी अनुकूलको एप्लिकेशन र माग बढ्दै गए यो सस्तो पर्न सक्छ । सेवाप्रदायकले प्राइस सन्तुलनमा नल्याउँदासम्म ग्राहकले ननप्रडक्टिभ वा मनोञ्जनका लागि फोरजी कमै चलाउने आँकलन गरिएको छ ।
