एसियन लाइफ इन्स्योरेन्स कम्पनी लिमिटेडले ५० प्रतिशत अर्थात दुई बराबर एकको अनुपातमा हकप्रद सेयर निष्काशन गर्ने भएको छ । कम्पनीले गत आर्थिक वर्षको कमाइबाट बोनस वितरण गरेपछिको चुक्तापुँजीको ५० प्रतिशत हकप्रद निष्काशन गर्न लागेको हो ।
हकप्रद निष्काशनको अनुमति माग गर्दै कम्पनीले नेपाल धितोपत्र बोर्डमा निवेदन दिएको छ । कम्पनीले जेठ ३० गते बोर्डमा निवेदन दिएको जानकारी दिएको छ । कम्पनीले एक सय रुपैयाँ अंकित मूल्यमा ४० करोड २७ लाख ९६ हजार छ सय २० रुपैयाँ बराबरको ४० लाख २७ हजार नौ सय ६६ दशमलव २० कित्ता हकप्रद सेयर निष्काशन गर्ने अनुमति माग गरेको हो ।
हाल एसियन लाईफ इन्स्योरेन्सको चुक्तापुँजी ६७ करोड रुपैयाँ रहेको छ । बोनस सेयर र हकप्रद सेयर जारी गरेपछि कम्पनीको चुक्तापुँजी एक अर्ब २० करोड रुपैयाँ नाघ्ने छ । ०७५ असार मसान्तसम्ममा एसियनले दुई अर्ब रुपैयाँ चुक्तापुँजी पुर्याउनुपर्नेछ ।
