लघुवित्तको थोक कर्जा प्रदायक संस्था रुरल माइक्रोफाइनान्स डेभलपमेन्ट सेन्टर लिमिटेडले चालू आर्थिक वर्षको दोस्रो त्रैमासमा आठ करोड ६६ लाख रुपैयाँ खुद मुनाफा आर्जन गरेको छ । बैंकले गत आर्थिक वर्षको सोही अवधिको तुलनामा ६.३९ प्रतिशत बढी नाफा कमाएको हो । गत आर्थिक वर्षको सोही अवधिमा रुरलले आठ करोड १३ लाख रुपैयाँ मुनाफा आर्जन गरेको थियो ।
हाल ६९ करोड २१ लख रुपैयाँ चुक्ता पूँजी रहेको संस्थाकोे समिक्षा अवधिमा निक्षेप संकलन आठ प्रतिशतले बढेर चार अर्ब ९६ करोड ४७ लाख रुपैयाँ पुगेको छ । संस्थाले यस अवधिमा कर्जा परिचालन २४.७० प्रतिशत अर्थात २३ करोड ७५ लाख रुपैयाँ बढाएर पाँच अर्ब ३३ करोड ८१ लाख रुपैयाँ पुर्याएको छ ।
छ महिनाको अवधिमा लघुवित्तले खुद ब्याज आम्दानी ११.७९ प्रतिशत वृद्धि गरी १४ करोड ७० लाख रुपैयाँ कमाएको छ । यस अवधिमा कम्पनीको सञ्चालन नाफा ६.५८ प्रतिशत वृद्धि भई १३ करोड ६० लाख रुपैयाँ पुगेको छ ।
निष्कृय कर्जालाई शून्य प्रतिशतमा राखिरहन सफल संस्थाले प्रोभिजनमा १६३ प्रतिशत बढाएर ५९ लाख रुपैयाँ राखेको छ भने जगेडाकोषमा एक अर्ब १९ करोड सात लाख रुपैयाँ राखेको छ । यो अवधिमा संस्थाको कर्मचारी खर्च आठ करोड रुपैयाँले बढेको पाइएको छ । यस अवधिमा रुरलकोे प्रतिसेयर आम्दानी १२.५२ रुपैँया, प्रतिसेयर नेटवर्थ २७२.०४ रुपैँया र पूँजीकोष अनुपात २६.४० प्रतिशत रहेको छ ।
