कुमारी बैंक लिमिटेडले चार वटा वित्तीय संस्थालाई एकैसाथ एक्वायर गरेर असार १६ गतेदेखि एकीकृत कारोबार सुरु गर्ने भएको छ । यसअघि असार १२ गतेदेखि एकीकृत कारोबार थाल्ने भनिएको विशेष कारणवश मिति सार्नुपरेको बैंकले जनाकारी दिएको छ । बैंकले काष्ठमण्डप डेभलपमेन्ट बैंक, पश्चिमाञ्चल फाइनान्स, महाकाली विकास बैंक र काँक्रेविहार विकास बैंकलाई आफुमा गाभेर ‘कुमारी बैंक लिमिटेड’को नामबाटै एकीकृत कारोबार सुरु गर्न लागेको हो ।
गत जेठ १७ गते नेपाल राष्ट्र बैंकबाट एक्विजिसनका लागि अन्तिम स्वीकृति पाएको बैंकले कम्पनी रजिष्ट्रारको कार्यालयबाट असार १ गते स्वीकृति पाएको थियो । विलय पुरा भए पछि कुमारी बैंकको दरबारमार्गमा रहेको स्थानमा नै मुख्य कार्यालय रहने बताइएको छ ।
बैंकले हालै जारी गरेको ५० प्रतिशत हकप्रद सेयर, गत आर्थिक वर्षको बोनस सेयर र चार वित्तीय संस्थासँगको एक्विजिसनपछि कुमारी बैंकको चुक्ता पूँजी पाँच अर्ब ९७ करोड रुपैंया पुगेको छ । गत चैत नौ गते सम्पन्न साधारण सभाले उल्लेखित चुक्ता पूँजी तयार गरी एक अर्ब १९ करोड रुपैंया बराबरको हकप्रद निष्काशन गर्ने प्रस्ताव पारित गरिसकेको छ । उक्त हकप्रद निष्काशन पश्श्चात बैंकको चुक्ता पूँजी सात अर्ब १६ करोड रुपैंया नाघ्ने छ ।
