हरेक साताको अन्तिम दिन शुक्रबार बैँकिङ खबर डट कमले साताभरिका बैँकिङ गतिविधिहरुलाई एउटै पानामा समेट्दै आइरहेको छ । यस साता पनि बैँक तथा वित्तिय क्षेत्रमा विभिन्न गतिविधिहरु भए । विशेषतः भारतीय मुद्राको अभावका कारण सीमावर्ती क्षेत्रमा ठगी कार्यले प्रश्रेय पाएको कुराले यस साता अधिक चर्चा पायो । समग्रमा, साताको सुरुवातदेखि बैँक तथा वित्तिय क्षेत्रमा भएका प्रमुख गतिविधिहरु यहाँ प्रस्तुत गरिन्छ :
भारतीय मुद्रा अभाव
नेपाल राष्ट्र बैँकले भारततर्फ पलायन भइरहेको पुँजी रोक्नका लागि भारतीय रुपैँयाको सटही सुविधा नियन्त्रण गर्न वाणिज्य बैँकहरुलाई निर्देशन दिएपछि त्यसको प्रत्यक्ष असर सीमावर्ती क्षेत्रमा देखियो । भारतीय मुद्राको अभावका कारण रक्सौलका व्यापारीबाट कयौँ नेपालीहरु ठगिए ।
मन्दिरको भेटी बैँकसम्म पुग्यो
विवादका कारण गत मंसिरदेखि पाथिभरा मन्दिरमा संकलन भएको भेटी बैँकमा जम्मा नगरिँदा कुहिने अवस्थामा पुगेको थियो । यसै सातादेखि सो रकम बैँकमा जम्मा हुन थाल्यो ।
मर्जर तथा एकीकृत कारोबार
टुरिजम बैँकले कालिञ्चोक डेभलपमेन्ट बैँक किन्ने भएको छ । किनबेचसम्बन्धि सम्झौतामा बुधबार हस्ताक्षर भएको छ । त्यस्तै, गरिमा विकास बैँकसँग सुभेक्षा विकास बैँक गाभिने भएपछि विहिबारबाट दुबैको शेयर कारोबार बन्द भएको छ । आगामी असार मसान्तबाट एकीकृत कारोबार सुरु हुने जनाइएको छ । मेगा बैँकले पश्चिमाञ्चल डेभलपमेन्ट बैँकलाई गाभ्ने प्रकृया पनि १५ महिनापछि टुंगोमा पुगेको छ । आगामी वैशाख १३ गतेदेखि मेगा बैँकको रुपमा एकीकृत कारोबार थालिने निर्णय भएको छ ।
सम्झौता
यसै साता, कर्जा सुरक्षण विभाग र नेपाल राष्ट्र बैँकबिच सुचना आदानप्रदानसम्बन्धि सम्झौता भयो । त्यस्तै, कुमारी बैँक र आइपे रिलायवल रेमिट्यान्स प्रालीबिच रेमिट्यान्स कारोबारमा आपसी सहकार्य गर्ने विषयमा सम्झौता भयो ।
नयाँ बैँकिङ प्रविधि
आधुनिक बैंकिङलाई भित्र्याउने क्रममा एभरेष्ट बैंकले भारतबाट मोबाइलमार्फत रकम पठाउन सकिने सेवा नेपालमै पहिलोपटक सुरु गर्यो । त्यस्तै, साताको विहिबारदेखि नविल बैँकले नेपालमै पहिलो पटक स्मार्ट बैँक, शेयर लोन र शेयर एकाउन्ट गरी तीन वटा बैँकिङ प्रविधि प्रयोगमा ल्यायो ।
शेयर
आइतबारदेखि नेपाल इन्भेष्टमेन्ट बैंकको एफपीओ नपरेको पैसा फिर्ता गर्न सुरु गरियो । गत ७ गतेदेखि सनराइज बैँकले संस्थापक समुहबाट ३४ कित्ता र साधारण समूहबाट २ लाख १८ हजार ४ सय ५४ कित्ता हकप्रद शेयर बोलकबोलका लागि शिलबन्दी बोलपत्र खुला गर्यो । नेपाल स्टक एक्सचेन्जमा सूचीकृत कम्पनिहरुको धितो सुरक्षामा सुलभता ल्याउनको लागि पोखरा फाइनान्सले शेयर कर्जा योजना सार्वजनिक गर्यो ।
शाखा विस्तार तथा स्थानान्तरण
साताको बुधबारदेखि ग्लोबल आइएमई बैँकले भारतको नयाँ दिल्लीमा सम्पर्क कार्यलयको सुरुवात गर्यो । जसपश्चात्, हालसम्म अष्ट्रेलियामा मात्र सम्पर्क कार्यालय रहेको बैँक नेपालबाहिरका दुई वटा देशमा सम्पर्क कार्यालय भएको पहिलो बैँक बन्यो ।
गभर्नर डा. नेपाल स्वदेश फिर्ता
गत चैत्र २६ गते अमेरिका प्रस्थान गरेका गभर्नर डा. चिरञ्जिवी नेपाल साताको मंगलबार स्वदेश फर्किए । अमेरिकाको वासिङ्टन डीसीमा सम्पन्न स्प्रिङ मिटिङ २०१६ मा सहभागीता जनाएर उनी स्वदेश फर्केका हुन् ।
वार्षिकोत्सव
साताको तेस्रो दिन अर्थात् मंगलबार सिटिजन्स बैँक इन्टरनेशनल लिमिटेडले आफ्नो नौँवौ वर्ष पूरा गरि दशौँ वर्षमा पाइला टेक्यो । बैँकले विभिन्न आर्थिक सहयोगका कार्यक्रमहरु सहित भव्यताका साथ वार्षिकोत्सव मनायो ।
