प्रभु बैंकले ४० प्रतिशत हकप्रद सेयर निष्काशन गर्ने भएको छ । शुक्रबार बैंकको १५ औं साधारणसभा मार्फत ४० प्रतिशत हकप्रद सेयर निष्काशन गर्ने प्रस्ताब सर्वसम्मतले पारीत गरिएको हो । हकप्रद सेयर जारी गरेसँगै प्रभु बैंकको चुक्ता पुँजी ८ अर्ब २३ करोड ३९ लाख ६२ हजार ८ सय पुग्ने छ । हाल चुक्तापुँजी ५ अर्ब ८८ करोड १४ लाख २ हजार रहेको छ । बैंक संचालक समितिका अध्यक्ष देवीप्रकाश भट्टचनको अध्यक्षतामा सम्पन्न १५ औं वार्षिक साधारणसभामा प्रमुख कार्यकारी अधिकृत अशोक शेरचनले उत्पादन क्षेत्र, कृषि, पर्यटन हाइड्रो लगायतका राष्ट्रिय हितका योजनामा बैंकले लगानीका नयाँ क्षेत्रहरु पहिल्याएर अघि बढ्ने प्रतिबद्धता ब्यक्त गरे ।
नयाँ सञ्चालक समिति चयन
यसैबीच प्रभु बैंकको आगामी ४ बर्षे कार्यकालका लागि सञ्चालक समितिको अध्यक्षमा संस्थापक सेयरधनीका तर्फबाट देवीप्रकाश भट्टचन निर्वाचित भएका छन् । अन्य सञ्चालकहरुमा अम्बिका शर्मा लामिछाने, दक्ष पौडेल सुभाष, पुष्प बहादुर प्रधान, कुसुम लामा र ऋषिराम गौतम निर्वाचित भएका छन् ।
अन्य बैंक तथा वित्तीय संस्थाहरु गाभ्ने प्रक्रिया जारी रहने
बैंकले अन्य बैंक तथा वित्तीय संस्थाहरु गाभ्ने/गाभिने, एक्विजिसन (प्राप्ति) तथा खरिद गर्ने प्रक्रियालाई निरन्तरता दिने भएको छ । हाल ९ ओटा वित्तिय संस्थाको मर्जरबाट बनेको प्रभु बैंक सबैभन्दा धेरै बैंकवित्त मर्जर गर्ने बैंकका रुपमा समेत चिनिएको छ । अन्य बैंक तथा वित्तीय संस्थाहरु गाभ्ने/गाभिने, एक्विजिसन (प्राप्ति) तथा खरिद गर्ने प्रक्रिया अगाडि बढाउने कार्यका लागि साधारणसभाले सञ्चालक समितीलाई अख्तियारी दिने निर्णय गरेको छ ।
दुर्गम क्षेत्रमा शाखा विस्तारमा जोड
बैंकले मर्जरको क्रममा एउटै ठाउँमा दोहोरिएका शाखाहरुलाई अन्य व्यवसायिक रुपबाट सम्भावित ठाँउहरुमा स्थानान्तरण गर्ने कार्यलाई ग्रामिण तथा दुर्गम क्षेत्रमा विस्तार गरेको छ । थप १२ वटा शाखाहरु स्थानान्तरण गर्ने कार्य मध्ये ६ वटा शाखाहरु स्थानान्तरण गरिसकेको र ६ वटा शाखाहरु स्थानान्त्रणको क्रममा रहेको बैंकले जनाएको छ । बैंकले पछिल्लो समय विकट मानिएका मनाङ जिल्लाको चामे, अछाम जिल्लाको कमलबजार र रुकुम जिल्लाको रामकोटमा ३ वटा नयाँँ शाखा बिस्तार गरेको छ । यससँगै प्रभु बैंकको शाखा सञ्जाल १ सय ४१ तथा एटिएम सञ्जाल १ सय २५ पुगेको बैंकले जनाएको छ । नीजि स्तरमा धेरै शाखा र एटीएम संख्या हुने यो पहिलो बैंक हो ।
प्रविधिमा फोकस गरीने
बैंकिङ कारोबारलाई छिटो, छरितो र सुरक्षित बनाउनका लागि बैंकले अन्तर्राष्ट्रियस्तरको बैंकिङ्ग सफ्टवेयर जडान गरी प्रयोगमा ल्याउने तयारीका साथ प्रभु बैंकले प्रविधिलाई जोड दिएको छ । बैकिङ क्षेत्रमा जोखिमको रुपमा हेरिएको ए.एम.एल., के.वाइ.सि. एटिएम कार्डको दुरुपयोग लगयातका कार्यहरुलाई दुरुस्त राख्नको लागि बिशेष सावधानिका उपायहरु अवलम्बन गर्ने तथा ई बैंकिङ, मोवाइल एप्स, मोवाइल वालेट तथा एटिएम सेवाको सञ्जाललाई अझै बृद्धि गरी ऋबकजभिकक बैंकिङको अवधारणालाई प्रोत्साहन गर्नेगरी बैंकिङ प्रविधिलाई जोड दिँदै अन्तर्राष्ट्रिय ब्राण्डका कार्डहरु प्रचलनमा ल्याउने योजना रहेको बैंकले जनाएको छ ।
बैंकको निक्षेप परिचालन : बैंकको निक्षेप समिक्षा बर्षमा रु ६० अर्ब ९४ करोड पुगेको छ । जुन अघिल्लो आर्थिक बर्षको निक्षेप रु ४२ अर्व १४ करोडको तुलनामा ४४.६० प्रतिशतले बढी हो । कूल निक्षेपमा बचत, मुद्धती, कल र अन्य निक्षेपको अनुपात क्रमश : ५४.७३ प्रतिशत, १९.२८ प्रतिशत, २१.७१ प्रतिशत र ४.२८ प्रतिशत रहेको छ ।
कर्जा परिचालन : आर्थिक बर्ष २०७१/७२ मा बैंकले कर्जा तथा सापटिको रुपमा रु २९ अर्व ६८ करोड परिचालन गरेकोमा आर्थिक बर्ष २०७२/७३ मा ६२.४२ प्रतिशतले बृद्धि गरी रु ४८ अर्ब २१ करोड बराबरको रकम परिचालन गर्न सफल भएको छ ।
कूल सम्पति : बैंकको कूल सम्पतिमा आर्थिक बर्ष २०७२/७३ मा ४६.९३ प्रतिशतले बृद्धि हुनगई रु ६८ अर्ब ३४ करोड पुगेको छ । अघिल्लो आर्थिक बर्षमा बैंकको कूल सम्पति रु ४६ अर्ब ५१ करोड रहेको थियो ।
खुद ब्याज आम्दानी तथा खुद मूनाफा : बैंकको खुद ब्याज आम्दानी अघिल्लो आ.बा.को तुलनामा २७.५१ प्रतिशले बढ्न गई रु १ अर्ब ९७ करोड पुगेको छ । त्यसैगरी खुद मूनाफामा ९.७३ प्रतिशतले बढोत्तरी भई रु १ अर्ब ११ करोड बराबर खुद मूनाफा गर्न बैंक सफल भएको छ ।
