बैंकिङ खबर/६० किलो सुन तस्करी प्रकरणमा दुई भुक्तानी सेवा प्रदायक कम्पनीको संलग्नता भेटिएको छ । प्रहरीको केन्द्रीय अनुसन्धान ब्यूरो (सीआइबी)ले गरेको दोस्रो चरणको अनुसन्धानबाट पेवेल नेपाल र सजिलो पेमेन्ट सर्भिसको संलग्नता भेटिएको हो ।
सीआइबीले सोमबार सरकारी वकिल कार्यालयलाई आफ्नो प्रतिवेदन बुझाएको छ । प्रतिवेदन अनुसार सुन तस्करीका लागि पेवेल र सजिलो पेको खातामा पैसा बचत गरी एजेन्टमार्फत अवैध भुक्तानी हुने गरेको खुलेको छ ।
स्थापनादेखि यी दुई पेमेन्ट गेटवेमार्फत कुल १ खर्ब २३ अर्बको कारोबार भएको छ । जसमा भौचर डिपोजिट गरी ९६ अर्ब रुपैयाँ बराबरको कारोबार भएको भेटिएको हो ।
सीआइबीले अनुसन्धानका क्रममा यी वालेटका ८ जनालाई पक्राउ गरी अनुसन्धान गरेको जनाएको छ । सुन तस्करीमा यी दुई गेटवेको संलग्न देखिएको भन्दै सीआइबीले दुवै कम्पनीको खाता रोक्का गर्न नेपाल राष्ट्र बैंकलाई पत्राचार गरेको थियो ।
गत जेठ २ गते एक सार्वजनिक सूचना जारी गर्दै राष्ट्र बैंकले पेवेल नेपाल र सजिलो पेमेन्ट सर्भिसेज सम्पूर्ण बैंकखाता रोक्का गरेको थियो । गत साउन २ गते प्रहरीले त्रिभुवन अन्तर्राष्ट्रिय विमानस्थलबाट ब्रेकसूमा लुकाएर ल्याएको ६० किलो सुन बरामद गरेको थियो । सीआईबीको अनुसन्धान अनुसार यही तस्करीमा संलग्न समूहले ३१९४ किलो सुन तस्करी गरेको खुलेको छ । जसमा ब्रेकसूमा लुकाएर मात्र ३६२ किलो ७७८ ग्राम सुन तस्करी गरिएको पाइएको छ ।
त्यस्तै, पानी तान्ने मोटर, विद्युतीय चुरोट (भेप) लगायत इलेक्ट्रोनिक सामानमा लुकाएर २ हजार ८३१ किलो सुन तस्करी भएको सीआइबीको अध्ययनको निष्कर्ष छ । यो सुन कुल ३० अर्ब ८२ करोड २२ लाख ९१ हजार २७२ रुपैयाँको हो ।
तस्करहरूले ५ वटा नक्कली कम्पनी खडा गरी उक्त परिमाणमा सुन ल्याएका हुन् । सुन तस्करीमा सीआइबीले ४६ जनालाई प्रतिवादी बनाएको छ । जसमा २० जनालाई पक्राउ गरेको छ भने २६ जना फरार छन् । सीआइबीले सुन तस्करीमा संलग्नहरूलाई २ खर्ब ६६ अर्ब ६७ करोड ९ लाख रूपैयाँ बिगो दाबी गरेको छ ।
