नक्कली सेयर कारोबारमा दोषी पाँच वर्षपछि नक्कली चेक ठगीमा पक्राउ

करिब ५ वर्षअघि नक्कली सेयर कारोबार गरेको तथा सोही सेयर बैंकमा धितो राखेर कर्जासमेत लिएर ठगीमा संलग्न गोविन्द घिमिरे पक्राउ परेका छन् । जनता बैंकको नक्कली चेक बनाएर सर्वसाधारणको रकम चोरी गर्ने क्रममा गत सोमबार पक्राउ परेको गिरोहमा घिमिरे पनि छन् । ‘सेयर ब्रोकर कम्पनीले घिमिरेको पहिचान गरिसकेको छ,’ धितोपत्र बोर्डका प्रवक्ता तथा कार्यकारी निर्देशक नीरज गिरीले भने, ‘हालसम्म उनी फरार रहेका कारण जिल्ला अदालतमा मुद्दा म्याद तामेलीमा थियो, अब अगाडि बढ्नेछ ।’  

फागुन ०७१ मा सार्वजनिक भएको नक्कली सेयर कारोबार काण्डका मुख्य योजनाकार मानिएका घिमिरे फरारको सूचीमा थिए । धितोपत्र बोर्डले उनीविरुद्ध २३ असार ०७४ मा जिल्ला अदालतमा मुद्दा दायर गरेको थियो । सोमबार परेको नक्कली चेक ठगी गिरोहमा समेत उनी योजनाकार रहेको प्रहरीको जिकिर छ ।

  नक्कली सेयर कारोबार काण्ड 
घिमिरेले ०७१ सालमा बागबजारमा कार्यालय नै खोलेर जिएनजी इन्भेस्टमेन्ट कम्पनी चलाएर बसेका थिए । कागजी रूपमा सेयर कारोबार हुने सो समयमा जिएनजी कम्पनीका सञ्चालकहरूले एक–आपसमा नक्कली सेयर बनाएर कारोबार मात्र गरे । सोही नक्कली सेयर धितो राखेर बैंकबाट १ करोड २३ लाख रुपैयाँभन्दा बढी कर्जासमेत लिन सफल भए । 
कम्पनीमा सञ्चालक बनाइएका रामहरि आचार्य, सोना दाहाल, सृष्टि काफ्लेका नामबाट चिलिमे जलविद्युत् कम्पनीको १३ हजार ५ सय कित्ता सेयर बिक्री गरिएको थियो । सो सेयर घिमिरेको नामबाट किनिएको थियो । सोही सेयर राखेर घिमिरेले तत्कालीन सिद्धार्थ डेभलपमेन्ट बैंक (हाल जनता बैंकमा मर्ज भएको) बाट ६४ लाख २० हजार रुपैयाँ र युनाइटेड फाइनान्सबाट ५९ लाख २७ हजार रुपैयाँ कर्जा लिएका थिए ।

 सो समय सामान्यतया एउटै प्रमाणपत्रमा ठूलो परिमाणमा भएको सेयर खण्ड–खण्डमा बेच्नुपर्दा अनुसूची फाराम भरेर बेच्नुपथ्र्याे । यस्तो अनुसूची फाराम सम्बन्धित कम्पनीमा दिएपछि सो कम्पनीले सेयर टुक्र्याएर अस्थायी पुर्जा दिने व्यवस्था थियो । यही अस्थायी पुर्जाको कारोबार हुन्थ्यो । हाल भने विद्युतीय अभिलेख (डिम्याट) का रूपमा रहेको सेयर मात्र बजारमा किनबेच हु्न्छ । 

घिमिरेले चिलिमे जलविद्युत् कम्पनीको नक्कली छाप र लेटर प्याड बनाएर अस्थायी पुर्जा बनाउने र एकपटक कारोबार गरेपछि बैंकमा धितो राखेर कर्जा लिने गर्दै आएका थिए । सो समय उनले सानिमा माई हाइड्रोपावरको सेयरसमेत यसरी कारोबार गरेका थिए । 

यी नक्कली सेयर कारोबार गराउने दुई ब्रोकरमध्ये एक अग्रवाल सेक्युरिटिजले ती बैंकहरूको कर्जा भुक्तान गरेर धितोपत्र बोर्डलाई रकम उठाइदिन पत्राचारसमेत गरेको थियो । चार वर्ष (२०७४ मा) पछि बोर्डले ग्राहक विवरणको अभिलेख नराखेको भन्दै अग्रवाल र श्रीहरि सेक्युरिटिजलाई १०–१० लाख र सिप्रवी सेक्युरिटिजलाई ५० हजार रुपैयाँ जरिवाना गरेको थियो । 

नक्कली सेयरपछि चेक काण्ड 
घिमिरे फरार अभियुक्तको सूचीमै रहे पनि जनता बैंकका निक्षेपकर्ता गोपालमान राजवाहकको खाताबाट १९ लाख १९ हजार रुपैयाँ निकाल्न सफल भएका थिए । राजवाहकको मोबाइलमा रकम झिकिएको एसएमएस आएपछि उनले प्रहरीलाई खबर गरेका थिए । यही आधारमा प्रहरीले यो काण्डमा संलग्न गिरोह नै पक्रिन सफल भएको हो । प्रहरीले घिमिरेसँगै अन्य पाँचजनालाई पक्राउ गरेर अनुसन्धान अगाडि बढाएको छ । गिरोहबाट प्रहरीले १८ लाख ५० हजार नगद, विभिन्न बैंकका चेक बुकहरू, खााता खोल्न तयार गरिएका फारामहरू, विभिन्न व्यक्तिका नागरिकतालगायत फेला पारेको हो ।  

नयाँ पत्रिका दैनिकमा प्रकाशित समाचार ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.