बैंकिङ खबर। राष्ट्रिय योजना आयोगले मध्यावधी समीक्षा अघि अर्थमन्त्रालयलाई पठाएको प्रतिवेदनमा लक्ष्य अनुसार आर्थिक वृद्धि हासिल नहुने अनुमान गरेको छ । आयोगका अनुसार चालु आर्थिक वर्षमा लक्ष्य भन्दा १ दशमलव ३ प्रतिशतले कम भई आर्थिक वृद्धिदर ६ दशमलव ७ प्रतिशतमा सिमित हुने प्रारम्भिक अनुमान छ ।
स्रोतका अनुसार अहिलेको प्रतिवेदन पहिलो तीन महिनाको तथ्यांकको आधारमा गरिएको अनुमानमा आधारीत छ । तर सरकारले गर्ने खर्च, निजी क्षेत्रको लगानी, मौसम, तथा कृषि क्षेत्रबाट हुने उत्पादनले आर्थिक वृद्धिदर ७ प्रतिशत भन्दा माथि पुग्ने सम्भावना पनि देखिन्छ । चालु आर्थिक वर्षमा धान उत्पादन राम्रो भएको, माघ महिनामा पानी परेका कारण गहुँपनि राम्रो उत्पादन हुने सम्भावना भएकाले पनि आर्थिक वृद्धिदर अहिले अनुमान गरिएभन्दा निकै माथि पुग्ने अनुमान योजना आयोगको छ । आयोगले चालु आर्थिक वर्षको वास्तविक अनुमान भने फागुन पछि मात्रै सार्वजनिक गर्ने छ ।
आयोगले अहिले सरकारी खर्च न्यून हुने, कृषि उत्पादन पनि अनुमान मात्र गर्न सकिने र व्यापार तथा उद्योगमा पनि कति लगानी पुग्छ आकलन गर्न नसकिने भएकाले आर्थिक वृद्धिको उचित प्रक्षेपण गर्न नसकिने जनाएको छ ।
सरकारले अवको केहीदिनमा मध्यावधी समीक्षा गर्ने तयारी गरिरहेको छ ।
