बैंकिङ खबर । मेगा बैंक नेपाल लिमिटेडले ७.८५ प्रतिशत लाभांश घोषणा गरेको छ । बैंकको पुस ४ गते बसेको संचालक समितिको बैठकले १.००२३३ प्रतिशत बोनस सेयर र ६.८५ प्रतिशत नगद लाभांश वितरण गर्ने प्रस्ताव अघि सारेको हो ।
बैंकले कुल ८० करोड ७६ लाख ५३ हजार चार सय ४६ रुपैयाँ ३९ पैसा बराबरको लाभांश वितरण गर्नेछ । जसमा ७० करोड ४५ लाख ५८ हजार रुपैयाँ नगद लाभांश र १० करोड ३० लाख ९४ हजार रुपैयाँ बराबरको बोनस सेयर रहेको छ । हाल मेगा बैंकको चुक्तापुँजी १० अर्ब २८ करोड ५५ लाख २६ हजार रुपैयाँ रहेको छ ।
प्रस्तावित लाभांश नेपाल राष्ट्र बैंकबाट स्वीकृत भई बैंकको आगामी साधारणसभाले पारित गरेपछि सेयरधनीले पाउनेछन् । बोनस सेयर वितरणपश्चात् बैंकको चुक्तापुँजी १० अर्ब ३८ करोड रुपैयाँ पुग्नेछ ।