निजी क्षेत्रको निर्जीवन बीमा कम्पनी लुम्बिनी जेनेरल इन्स्योरेन्स कम्पनी लिमिटेडले गत आर्थिक वर्षमा १५ करोड ५९ लाख रुपैयाँ खुद मुनाफा कमाएको छ । कम्पनीले एक वर्षको अवधिमा १ सय ३० दशमलव ०७ प्रतिशतले नाफा बढाएको हो । अघिल्लो आर्थिक वर्षमा कम्पनीले मुनाफा ६ करोड ७५ लाख रुपैयाँ कमाएको थियो ।
३३ करोड रुपैयाँ चुक्ता पुँजी भएको कम्पनीले जगेडा कोषमा १४ करोड २९ लाख रुपैयाँ राखेको छ भने बीमा कोषमा २४ करोड ४ लाख रुपैयाँ राखेको जनाएको छ । कम्पनीको आम्दानीमा १ सय २४ दशमलव ७७ प्रतिशतले बढेर २५ करोड ४७ लाख रुपैयाँ पुग्दा खर्च १ सय १७ दशमलव ७७ प्रतिशतले बढेर ९ करोड ८७ लाख रुपैया पुगेको छ । बीमा शुल्कवापत कम्पनीले ४८ करोड २९ लाख रुपैयाँ आर्जन गरेको छ भने २३ करोड ४९ लाख रुपैयाँ बराबरको दाबी भुक्तानी गरेको छ । यस अवधिमा कम्पनीले १ लाख ३१ हजार ४ सय ८६ वटा बीमा लेख जारी गरेको छ भने ३ हजार ६ वटा दाबी भुक्तानी गरेको छ ।
कम्पनीको प्रति शेयर आम्दानी ४७ दशमलव २६ पैसा रहेको छ भने मुल्य आम्दानी अनुपात ३० दशमलव ६८ गुणा, प्रति शेयर नेटवर्थ २ सय १९ दशमलव ५२ रुपैयाँ र प्रति शेयर कुल सम्पतिको मुल्य ४ सय ६५ दशमलव ०८ रुपैयाँ रहेको छ ।
