नेपालको बैंकिङ तथा वित्तीय क्षेत्रमा स्थापित एटीएम (अटोमेटेड टेलर मेशिन) नेटवर्कका रूपमा रहेको एसटीसी नेटवर्क अब अन्तर्राष्ट्रिय बजारमा प्रवेश गर्ने भएको छ । नेपालको घरेलु ब्राण्डका रूपमा रहेको स्मार्ट च्वाइस टेक्नोलोजी प्रालिद्वारा सञ्चालित सो नेटवर्क चाइना युनियन पे र डिस्कभर फाइनान्सियल सर्भिसेजसँगको सहकार्यमा विश्वबजारमा प्रवेश गर्न लागेको हो ।
हाल विश्वकै सबैभन्दा बढी एटीएम कार्ड प्रचलनमा ल्याउने कम्पनीका रूपमा रहेको चाइना युनियन पेको एटीएम कार्ड विश्वका १ सय ५० भन्दा बढी देशमा प्रयोग गर्न सकिन्छ । त्यस्तै डिस्कभर नेटवर्कको एटीएम कार्ड १ सयभन्दा बढी देशमा प्रयोग गर्न सकिन्छ । यस्तो अवस्थामा विदेश जाँदा नेपालको मौद्रिक नीतिअनुसार ‘भ्रमण कोटा’अनुसारको रकम झिक्न सकिनेछ ।
हाल एससीटीको एटीएम कार्ड नेपाल, भारत र भुटानमा मात्रै सीमित रहेको छ । नेपाल राष्ट्र बैंकको हालको व्यवस्थाअनुसार नेपालको बैंकमा रहेका खाताबाट १ वर्षमा विदेशस्थित सम्बन्धित मुलुकको एटीएमबाट १० हजार डलर झिक्न पाउनेछन् । त्यसबाहेक विदेशी डलर स्रोतमा बैंक खाता रहेका व्यक्तिले भने सामान्य किसिमले भुक्तानी सेवा लिनसक्ने छन् । त्यस्तै साझेदार नेटवर्कका एटीएम कार्डवाहकले एसटीसी नेटवर्कमार्फत भुक्तानी लिन सक्छन् ।
