सरकारले आगामी आर्थिक वर्षको लागि तयार पारेको नीति तथा कार्यक्रम मन्त्रिपरिषदको आइतबार प्रधानमन्त्री निवास बालुवाटारमा बसेको बैठकले पारित गरेको छ । नीति तथा कार्यक्रममा संविधान कार्यान्वयन, तीन वटै तहको निर्वाचन सम्पन्न गर्ने कार्यभार, राष्ट्रिय महत्वका आयोजना लगायतलाई प्राथमिकतामा राखिएको बताइएको छ ।
मन्त्रीपरिषद्बाट पारित नीति तथा कार्यक्रमलाई आइतबार नै राष्ट्रपति समक्ष पेश गर्ने निर्णय बैठकले गरेको छ । राष्ट्रपतिसँगको परामर्शपछि संसदमा नीति तथा कार्यक्रम पेश गर्ने मिति तय हुने छ ।
नयाँ आर्थिक वर्षको बजेट पेश गर्नु अघि नै संसदमा सरकारले नीति तथा कार्यक्रम पेश गर्नुपर्ने संवैधानिक व्यवस्था छ । प्रचण्ड नेतृत्वको वर्तमान सरकारले जेठ १५ गते काम चलाउ बजेट पेश गर्ने तयारी गरेको छ । पूर्वसहमति अनुसार प्रचण्डले कांग्रेस सभापति शेरबहादुर देउवालाई सत्ता हस्तान्तरण गरेपछि नयाँ सरकारले पूर्ण बजेट ल्याउने छ ।
