जिल्ला सदरमुकाम भैरहवामा केन्द्रीय कार्यालय रहेको पूर्णिमा विकास बैंक लिमिटेडले १० औं वर्ष प्रवेश गरेको अवसरमा विभिन्न सामाजिक कार्यको आयोजना गरेको छ । साथै बार्षिक उत्सवकै अवसरमा बैंकले आफ्नो सेवा समेत विस्तार गरेको छ ।
बैंकले सेवा बिस्तार अन्र्तगत आइतबार भलबारी शाखामा ए.टि.एम सेवा शुभारम्भ गरेको छ । बैंकका अध्यक्ष निधानचन्द्र श्रेष्ठले सो ए.टि.एम सेवा उद्घाटन गरि सेवा शुभारम्भ गरेका हुन् । यस अगाडी बैंकले रुपन्देही जिल्लाको ग्रामिण क्षेत्र धकधईमा पनि ए.टि.एम सेवा संचालनमा ल्याएको थियो ।
बार्षिक उत्सव अन्र्तगत बैंकले आइतबार भैरहवामा रक्तदान कार्यक्रमको आयोजना समेत गर्यो । नेपाल रेडक्रस सोसाईटीका केन्द्रीय उपाध्यक्ष तथा प्रध्यापक सुदरसन प्रसाद नेपालको प्रमुख आतिथ्यतामा सम्पन्न रक्तदान कार्यक्रममा बैंकका कर्मचारी तथा सामाजिक कार्यकर्ता गरि २२ जनाले रक्तदान गरे ।
वार्षिकोत्सवकै अवसर पारेर विभिन्न विद्यालयहरुमा वित्तीय साक्षरता कार्यक्रम समेत सम्पन्न गरेको बैंकले जानकारी दिएको छ । साथमा बैंकले भैरहवादेखि गौतम बुद्धको जन्मस्थल लुम्बिनीसम्म शान्ति पदयात्रा कार्यक्रम समेत सम्पन्न गरेको छ ।
पूर्णिमा विकास बैंकले हालसम्म तीन जिल्लामा गरी आठ वटा शाखा विस्तार गरेको छ । हाल बैंकको अधिकृत पुँजी ५० करोड रुपैयाँ र चुक्तापुँजी ३५ करोड २३ लाख रुपैयाँ रहेको छ । बैंकले आठ करोड ८० लाख रुपैयाँ बराबरको हकप्रद सेयर निष्काशन गर्न नेपाल धितोपत्र बोर्डबाट स्वीकृति पाइसकेको छ । हकप्रद निष्काशनसम्बन्धी अन्य आवश्यक प्रक्रिया तीव्र रुपमा चलिरहेको बैंकका प्रमुख कार्यकारी अधिकृत प्रकाश गुरुङ्गले जानकारी दिए ।
ग्राहकको मागअनुसार कृषि, बैदेशिक रोजगार, विपन्न बर्ग कर्जा प्रवाह गर्दै आईरहेको बैंकले जिल्लाका ग्रामिण भेगमा रहेको जनतालाई समेत बैंकिङ्ग कारोबारमा जोड्ने रणनिति लिएको छ ।
