चितवनको नारायणगढ र भरतपुर क्षेत्रमा रहेको बैङ्क, वित्तीय संस्था तथा सुनचाँदी व्यवसायको सुरक्षाका लागि हतियारसहितका सुरक्षाकर्मीलाई चौबिसै घण्टा परिचालन गरिएको छ ।
सोमवारदेखि लागू हुने गरी सो क्षेत्रमा शान्ति सुरक्षा र अपराध नियन्त्रणका लागि प्रहरीको ‘फाइनान्स टास्क फोर्स’ परिचालन गरिएको चितवन प्रहरीले बताएकोे छ । यहाँको सुनचाँदी व्यवसायमा लगातार चोरीका घटना भएपछि आइतवार उद्योग वाणिज्य सङ्घ, सुनचाँदी व्यवसायी र प्रहरीबीचको छलफलले यस्तो निर्णय गरेको थियो । यसअघि सुरक्षाको माग गर्दै सुनचाँदी व्यवसायीले आन्दोलनको घोषणा गरेका थिए । ‘आजबाट चौबिसैँ घण्टा, हातहतियार र सञ्चार सेटसहित क्युआरटी टोली र फाइनान्स टास्कफोर्स परिचालन भएका छन्, चितवनका प्रहरी नायब उपरीक्षक दिपक श्रेष्ठले भने, ‘आवश्यकता अनुसार मोबाइल टोली समेत खटाइएको छ ।’
नारायणगढमा यही माघ २० गते राति आधुनिक सुनचाँदी पसलबाट चार किलो सुन र चार किलो ५ सय ग्राम चाँदीसहित नगद रू. सात लाख चोरी भएको थियो । त्यसैगरी शुक्रवार राति अनुग्रह गहना सप्लायर्सबाट कीरब रू. आठ लाख बराबरको सुनको जलप गरिएका गहना चोरी भएको थियो । चोरीमा संलग्नलाई प्रहरीले पक्राउ गर्न सकेको छैन । मुख्य गरी मध्य क्षेत्रकै व्यापारिक बजार नारायणगढमा सुनचाँदी व्यवसाय र बैङ्क तथा वित्तीय संस्था केन्द्रित छन् ।
सुरक्षा कमजोर भएर चोरीका घटना बढेको भन्दै सुनचाँदी व्यवसायीले चितवन प्रशासनमार्फत सरकारलाई ज्ञापनपत्र समेत बुझाएका थिए । रासस
