सूर्योदय लघुवित्त वित्तीय संस्था लिमिटेडले चालू आर्थिक वर्षको दोस्रो त्रैमासमा एक करोड ४९ लाख ८० हजार नौ सय रुपैयाँ खुद मुनाफा आर्जन गरेको छ । संस्थाको मुनाफा गत आर्थिक वर्षको सोही अवधिको तुलनामा दुई गुण बढेको हो । गत आर्थिक वर्षको दोस्रो त्रैमासमा सूर्योदयको खुद मुनाफा ७० करोड ३२ लाख दुई सय ९० रुपैयाँ थियो ।
चार करोड रुपैयाँ चुक्तापुँजी रहेको लघुवित्तको सञ्चालन मुनाफा दुई गुणाले बढ्दा खुद व्याज आम्दानी ८६.६५ प्रतिशतले बढेको छ । जसअनुसार, गत आर्थिक वर्षको दोस्रो त्रैमासमा एक करोड १० लाख ५० हजार रुपैयाँ रहेको सञ्चालन मुनाफा चालू आर्थिक वर्षमा दुई करोड ३५ लाख ४१ हजार रुपैयाँ पुगेको छ । खुद व्याज आम्दानी भने एक करोड ८६ लाख आठ हजार रुपैयाँबाट बढेर तीन करोड ४७ लाख ३३ हजार रुपैयाँ पुगेको छ । यो अवधिमा कम्पनीको कुल सम्पत्ति ४९ प्रतिशत बढेर ७१ करोड ७९ लाख ४५ हजार रुपैयाँ पुगेको छ ।
यो अवधिमा कम्पनीको कर्जा निक्षेप अनुपात ३३०.६४ प्रतिशतबाट घटेर ३०४.०८ प्रतिशत कायम भएको छ । कम्पनीले निक्षेप र कर्जा लगानीमा क्रमशः २६.४१ प्रतिशत र ८५.२४ प्रतिशतले सुधार गरेको छ । जसअनुसार, संस्थाको निक्षेप संकलन ४३ करोड १६ लाख ४६ हजार रुपैयाँ र कर्जा लगानी ५६ करोड २० लाख ७७ हजार रुपैयाँ पुगेको छ । गत आर्थिक वर्षको दोस्रो त्रैमासमा सूर्योदयले ३४ करोड १४ लाख ४२ हजार रुपैयाँ निक्षेप संकलन गरी ३० करोड ३४ लाख २६ हजार रुपैयाँ कर्जा लगानी गरेको थियो ।
निष्क्रिय कर्जा शून्य दशमलव १७ प्रतिशत रहेको संस्थाले जगेडा कोषमा तीन गुणा बढाएर तीन करोड २३ लाख ५४ हजार रुपैयाँ पुर्याएको छ । संस्थाको प्रतिसेयर वार्षिक आम्दानी ७४ रुपैयाँ ९० पैसा, प्रतिसेयर कुल सम्पत्तिकमो मूल्य एक हजार सात सय ९४ रुपैयाँ ८६ पैसा, तरलता अनुपात ७४.२९ प्रतिशत र प्रतिसेयर नेटवर्थ एक सय ८० रुपैयाँ ९० पैसा रहेको छ ।
