हिमालयन पावर पार्टनर लिमिटेडको १० लाख ६५ हजार चार सय १७ कित्ता साधारण सेयर माघ १७ गतेदेखि निष्काशन भएको छ । कम्पनीले एक सय रुपैयाँ अंकित दरमा १० करोड ६५ लाख ४१ हजार सात सय रुपैयाँ बराबरको सेयर स्थानीय वासिन्दाका लागि जारी गरेको हो ।
छिटोमा फगुन २ गते र ढिलोमा फागुन १७ गतेसम्म आवेदन दिन सकिने उक्त सेयरको निष्काशन तथा विक्रीको प्रबन्ध ग्लोबल आईएमई क्यापिटल लिमिटेडले गर्दैछ । लमजुुङ्ग जिल्लाको उक्त आयोजनाबाट अति प्रभावित हुने चिती, ढोडेनी, बन्सर,नौथर, श्रीमञ्ज्याङ्ग, अर्चलबोट गरि छ वटा गाबिसका बासिन्दाले पाँच लाख ३२ हजार सात सय आठ कित्ता सेयरका लागि आवेदन दिन सक्नेछन् ।
इच्छुक व्यक्तिहरुले हिमालयन पावर पार्टनर लिमिटेड आयोजनको साइट कार्यालय, ग्लोबल आइएमई बैङ्कका बेसी शहर शाखा, प्यासिफिक डेभलपमेण्ट बैङ्क, भेडेटार र कैलाश विकास बैङ्क लिमिटेडको बेसिशहर शाखा कार्यालयमार्फत आवेदन दिन सक्नेछन् । यो निष्कासन पश्चात् कम्पनीको चुक्ता पूँजी रू. ८५ करोड २३ लाख पुग्ने कम्पनीले प्रकाशित गरेको आह्वान पत्रमा उल्लेख छ ।
कम्पनीको सेयरलाई इक्रा नेपालले ग्रेड फोर प्लसको रेटिङ दिएको छ । यो रेटिङले कम्पनीको आधारभूत पक्ष औसतभन्दा कमजोर रहेको संकेत गर्दछ । हाल कम्पनीको नगद मौज्दात ४ करोड ८२ लाख ८ हजार रुपैँया रहेको छ । कर्जा तथा सापटी तर्फ ३१ करोड २२ लाख ७० हजार रुपैँया र अन्य चालु सम्पत्ति एक करोड ७८ लाख २९ हजार रुपैँया बराबर रहेको छ भने एक करोड ५२ लाख ९ हजार रुपैँया बराबरको उपकरणहरु रहेका छन् । कम्पनीको सेयर पूँजी ७४ करोड ५७ लाख ९२ हजार रुपैँया र दिर्घकालिन कर्जा ९६ करोड ८० लाख १० हजार रुपैँया रहेको छ । त्यस्तै अन्य चालु दायित्व अन्र्तगत ८० लाख ९२ हजार तथा कम्पनीले ७ लाख ६३ हजार कर तिर्न बाँकी रहेको छ ।
कम्पनीले लमजुङ जिल्लाको दोर्दी खोलामा २७ मेगावाटको जलविद्युत परियोजना निर्माण गर्दैछ । गत अप्रिलसम्म निर्माण कार्य २० प्रतिशत सम्पन्न हुँदा कुल लागतको २५ प्रतिशत रकम खर्च भइसकेको छ । यो आयोजना निर्माणको कुल लागत ४ अर्ब २३ करोड अनुमान गरिएकोमा संस्थापकहरुले ७४ करोड ६० लाख लगानी गरिसकेका छन् भने ३ अर्ब १७ करोड बैंक कर्जा लिइएको छ । अपुग रकम आइपीओ जारी गरेर जोहो गरिने भएको हो ।
