नेपाल राष्ट्र बैंकले तरलता कम गर्ने उद्देश्यले प्रस्ताव गरेको ४० अर्ब रुपैयाँमा २७ वटा बैंकहरुबाट आवेदन परेको छ । मंगलबार राष्ट्र बैंकले छ महिना अवधिका लागि राष्ट्र बैंक ऋणपत्र बेचेर पैसा लैजान आह्वान गरेकोमा २७ वटा बैंकहरुले मात्रै आवेदन दिएका छन् । आवेदन दिएकामध्ये स्टान्डर्ड चार्टर्ड बैंकले मात्रै पैसा लैजान चासो देखाएको नेपाल राष्ट्र बैंकले जनाएको छ ।
स्टान्डर्ड चार्टर्डले चार वटा आवेदनमार्फत ३.७४ देखि ३.८९ प्रतिशतसम्म ब्याज तोकेर आवेदन दिएको थियो । अन्तर बैंक कारोबारमा चलेको ब्याज दर हाराहारी आवेदन दिएकाले राष्ट्र बैंकले उसलाई एक अर्ब ५३ करोड रुपैयाँ उपलब्ध गराएको जनाएको छ । तर, बैंकहरुले ९ अर्ब ५६ करोड रुपैयाँ बराबरको आवेदन अन्तर बैंक ब्याज दर ३.७४ प्रतिशतभन्दा पनि तल गएर हालेपछि राष्ट्र बैंकले २६ वटा बैंकहरुको आवेदन खारेज गरिदिएको छ ।
