Saturday , February 25 2017

बैंकिङ संक्षेप

‘भ्रष्टाचार र अनियमितता रोक्न वित्तीय ज्ञान जरुरी’

नेपाल राष्ट्र बैंकका डेपुटी गभर्नर चिन्तामणि सिवाकोटीले सबै क्षेत्रमा मानिसलाई वित्तीय साक्षरता आवश्यक रहेको बताएका छन् । अनेरास्ववियु पब्लिक युथ क्याम्पसद्धारा आयोजित एक कार्यक्रममा बोल्दै उनले वित्तीय साक्षरता पैसा आर्जन गर्ने र सो रकमको सदुपयोग गर्ने ज्ञानसँग सम्बन्धित भएको र यो सबै क्षेत्र र वर्गका मानिसलाई आवश्यक भएको प्रष्ट पारे ।

भ्रष्टाचार र अनियमितता रोक्न समेत वित्तीय साक्षरता जरुरी भएको उनको भनाई थियो । सिवाकोटीका अनुसार, अझै पनि ६० प्रतिशत नेपाली बैंकिङ पहुँच बाहिर रहेका छन् । 

नेपाल बैंकका बिर्तामोड शाखा प्रबन्धकको निधन

नेपाल बैंक लिमिटेड बिर्तामोड शाखाका प्रबन्धक उमेशचन्द्र घिमिरेको गएराति लडेर मृत्यु भएको छ । गएराति बाथरुममा चिप्लिएर उनी लडेका थिए । बाथरुममा लडेर अचेत भएका उनलाई तत्काल उपचारका लागि बिर्तामोडस्थित पूर्ण टुङ बिर्तासिटी हस्पिटल पुर्याइए पनि उनको अस्पताल पुर्याएलगत्तै मृत्यु भएको इलाका प्रहरी कार्यालय बिर्तामोडका प्रहरी नायब उपरीक्षक केशवकुमार थेवेले जानकारी दिए ।

एकचालिस वर्षीय घिमिरे डेढ वर्षयता बिर्तामोडस्थित नेपाल बैंकको शाखा कार्यालयमा प्रबन्धकको काम गर्दै आएका थिए । काठमाडौँ स्थायी घर भएका उनी बनेपाबाट सरुवा भएपछि बिर्तामोड शाखामा कार्यरत रहेका थिए । रासस
 

सिटिजन्स बैंकको भैंसेपाटी शाखामा एटीएम सेवा

सिटिजन्स बैंक इन्टरनेसनल लिमिटेडले विहीबार (पुस ७ गते) देखि ललितपुर स्थित आफ्नोे भैंसेपाटी शाखाबाट एटीएम सेवा सञ्चालनमा ल्याएको छ । यससँगै बैंकको कुल एटीएम संख्या ५३ पुगेको छ । जसमध्ये, २७ वटा एटीएम उपत्यका भित्र छन् भने २६ वटा एटीएम उपत्यकाबाहिर छन् । 

यसबाहेक, बैंकले आफ्नो ५८ वटा शाखा र ७२ वटा शाखारहित आधुनिक बैकिङ्ग सेवाबाट करिब ४ लाख १७ हजार ग्राहकहरुलाई सेवा प्रदान गरिरहेकोे छ । 

राष्ट्र बैंकले तोकेभन्दा दोब्बर बढी चुक्ता पुँजी पुर्यायो लक्ष्मी लघुवित्तले 

लक्ष्मी लघुवित्त वित्तीय संस्था लिमिटेडले आफ्नो चुक्ता पुँजी २२ करोड रुपैयाँ पु¥याएको छ । नेपाल राष्ट्र बैंकले राष्ट्रिय स्तरको लघुवित्त कम्पनीहरुलाई चुक्ता पुँजी न्यूनतम १० करोड पुर्याउन सुझाव दिएको छ । तर लक्ष्मी लघुवित्त वित्तीय संस्थाले राष्ट्र बैंकको सुझावभन्दा दोब्बर बढी अर्थात २२ करोड रुपैयाँ चुक्ता पुँजी पुर्याएको हो । 
१० प्रतिशत बोनस सेयर र सत्प्रतिशत् राईट सेयर जारी गरि लक्ष्मीले चुक्ता पुँजी २२ करोड पुर्याएको हो । ७० प्रतिशत सेयर आफ्नै स्वामित्वमा र ३० प्रतिशत सेयर पब्लिक तथा कर्मचारीहरुको स्वामीत्वमा हुने गरि पुँजी निर्माण गरिएको लक्ष्मी लघुवित्तका प्रमुख कार्यकारी अधिकृत प्रकाश राज शर्माले जानकारी दिए । 

लक्ष्मी लघुवित्तले उठाउनुपर्ने कर्जा १ अर्ब ६० करोड भन्दा बढी छ भने निक्षेप ४७ करोड रहेको छ । यो संस्था २१ प्रतिशत नाफा वितरण गर्न सफल पनि भएको छ । अघिल्लो वर्ष राम्रो मुनाफा गरेको यस संस्थाले चालु आर्थिक वर्षको अन्त्यसम्म पनि रामै्र प्रतिफल दिने आशा गरिएको सीईओ शर्माले बताए । लक्ष्मी लघुवित्तले खासगरी कृषि र पशुपालनको क्षेत्रमा बढी लगानी गर्दै आएको छ । पछिल्लो समयमा यस संस्थाले महीनादिनमै २५ करोडको हाराहारीमा लगानी गरेको छ । चालु आर्थिक वर्षमा मात्रै यो लघुवित्तको लगानी २ अर्ब भन्दा बढी छ ।

 ४७ हजार ग्राहक रहेका यस लघुवित्तको ४० ओटा शाखा सञ्चालनमा छन् । ०६७ साल देखि सञ्चालनमा आएको लक्ष्मी लघुवित्त वित्तीय संस्थाले हालसम्म ३२ जिल्लामा आफ्नो सेवा विस्तार गरिसकेको छ । 
 

उत्कृष्ट एजेन्ट साझेदारलाई आईएमईले थाइल्याण्ड घुमायो

आईएमई लिमिटेडले आफ्ना १० उत्कृष्ट व्यावसायीक साझेदारहरुलाई थाईल्याण्ड भ्रमण गराएको छ । २०७२ साल पौषदेखि २०७३ साल असारसम्म कारोबार लगायत अन्य मापदण्डका आधारमा १० उत्कृष्ट व्यवसायीक साझेदारहरु उक्त भ्रमणमा समेटिएका थिए । 

आफ्नो स्थापना देखि नै रेमिट्यान्स सेवालाई प्रत्येक नेपालीको पहुँचसम्म पुर्याउन प्रतिबद्ध आईएमईसँग नेपालका सहरी तथा ग्रामिण क्षेत्रलाई समेट्ने गरी १ सय ४९ आईएमई सेन्टर सहित ७५ जिल्लाका ५,४०० सयभन्दा बढी सव–एजेन्ट र बैंक तथा वित्तीय संस्थाका शाखामार्फत् रेमिट्यान्स सेवा प्रदान गर्दै आइरहेको छ । आईएमई हालै ‘सुलिभान एण्ड फ्रोस्ट’ द्वारा ‘वेष्ट रेमिटेन्स कम्पनी अवार्ड – २०१६’ बाट सम्मानित भएको छ । 

ग्लोबल आइएमई बैंकलाई ‘बेष्ट इन्टरनेट बैंक’ अवार्ड

global-ime

ग्लोबल आइएमई बैंक ‘बेष्ट इन्टरनेट बैंक २०१६ – नेपाल’ अवार्डबाट सम्मानित भएको छ । लण्डनबाट प्रकाशित हुने प्रसिद्ध म्याग्जिन “इन्टरनेशनल फाइनान्स म्यागजिन” द्वारा  अवार्डबाट सम्मानित भएको छ । सिगांपुरमा आयोजना भएको एक विशेष कार्यक्रमका बिच बैंकका अध्यक्ष श्री चन्द्र प्रसाद ढकाल तथा बैंकका प्रमुख कार्यकारी अधिकृत श्री अनिल ज्ञावलीे ले सो पुरस्कार ग्रहण गर्नु गरेका थिए । ग्लोबल आइएमई बैंकलाई गुणस्तरिय इन्टरनेट बैंकिङ्ग सेवा प्रदान गरेको आधारमा उक्त सम्मानद्धारा सम्मानित गरेको हो । ग्लोबल आइएमई बैंके नेपाली भाषा (देवनागिरिमा) इन्टरनेट बैंकिङ्ग सेवा प्रदान गर्ने नेपालमा पहिलो बैंक हो । बैंकले आफ्ना ग्राहकहरु माझ सहज बैंकिङ्ग सेवा प्रदान गर्ने लक्ष्यले अत्याधुनिक प्रबिधियुक्त सुरक्षित ग्लोबल अनलाईन इन्टरनेट बैंकिङ्ग तथा ग्लोबल स्मार्ट मोबाइल बैंकिङ्ग सेवा प्रदान गर्दै आइरहेको छ । 

नेपाल एसबिआई बैंकले पायो मर्चेन्ट बैंकर सञ्चालनको अनुमती

nepal-sbi-bankनेपाल एसबिआई बैंकले मर्चेण्ट बैंकर सञ्चालनको अनुमती पाएको छ । एसबिआई बैंककोे शतप्रतिशत लगानी रहने नेपाल एसबिआई मर्चेन्ट बैकिङ्ग लिमिटेड संचालन गर्न धितोपत्र बोर्डले शुक्रबार अनुमति दिएको हो । यो कम्पनी एसबिआई बैंकको सहायक कम्पनीको रुपमा रहने बताइएको छ । कम्पनीको चुक्तापूँजी दश करोड रुपैयाँ रहेको छ । 


 

अब मोबाइल एप्लिकेसन डेभलपमेन्ट पढ्न विदेश जानुनपर्ने 

mobile-appनेपालमा पनि स्नातक तहको मोबाइल एप्लिकेसन डेभलपमेन्ट विषयको अध्ययन अध्यापन हुने भएको छ । कमलपोखरीमा रहेको इस्लिङ्टन कलेजले बेलायतको मेट्रोपोलिटियन विश्वविद्यालयको सहकार्यमा नेपालमा पहिलो पटक आगामी शैक्षिकसत्रदेखि अन्तर्राष्ट्रियस्तरमा सो विषयमा पठनपाठन सञ्चालनमा ल्याउन लागेको हो । यसका लागि इस्लिङ्टन कलेजका अध्यक्ष सुलभ बुढाथोकी र मेट्रोपोलिटियन विश्वविद्यालयका उपकुलपति प्रा जोन र्याफ्टेरी बीच आपसी सहमति समेत भएको छ ।

उक्त विषयमा सिमेस्टर सिस्टममा पढाई हुने र तीन वर्षमा अध्ययन सम्पन्न हुने बताइएको छ । दश जोड दुई तहमा व्यवस्थापन तथा विज्ञान विषय अध्ययन पूरा गरेका छात्राछात्राले सो विषय अध्ययन गर्न योग्य हुने छन् । 

मेलम्चीमा भेटियो पहेँलो पद्धार्थ, सुन भएको आशंका 

मेलम्ची आयोजनाको हेडवक्र्स निर्माणको क्रममा पहेँलो पद्धार्थ भेटिएपछि सुन हुन सक्ने भन्दै निर्माणको काम स्थगित गरिएको छ । मेलम्ची नदी छेउको पहाड काट्ने क्रममा पहेँलो पदार्थ भेटिएपछि सुरक्षाको कारण भन्दै काम तत्कालका लागि रोकिएको हो । पहाड काट्दा निस्किएको माटोमा चम्किलो पहेँलो कणहरु देखिएका थिए । त्यो पदार्थ के हो भन्ने त्यहाँ खटिएका इञ्जिनियरले पत्ता लगाउन सक्ने अवस्था नभएपछि उक्त क्षेत्रलाई प्रहरीको सुरक्षा घेराभित्र राखिएको छ । 

वित्तीय साक्षरतासम्बन्धी पुस्तक ‘फिनलिको’ अब अंग्रेजीमा पनि

वित्तीय साक्षरताका लागि प्रकाश कोइरालाद्धारा लिखित पुस्तक फिनलिको अंग्रेजी भाषामा पनि प्रकाशीत भएको छ । स्वीडेनको रोयल कोयेन क्याबिनेटमा चाइल्ड एन्ड युथ फाइनान्सका निर्देशक विसेल भेन काम्पेनले सोमबार उक्त पुस्तकको बिमोचन गरेका हुन् । फिनलिकोको नेपाली संस्करण दुई महिनाअघि प्रकाशीत भएको थियो । कोइराला नेपालमा वित्तीय साक्षरता अभिबृद्धिका लागि स्वयंसेवको रुपमा सक्रिय छन् ।