Friday , February 24 2017

बैंकिङ संक्षेप

सानिमा बैंक र बागमति डेभलपमेण्ट बैंकको एकिकृत कारोबार शुरु

सानिमा बैंकले बागमती डेभलपमेन्ट बंैकलाई किने पछि आइतबारबाट एकिकृत कारोबार शरु गरेको छ । सर्लाहीको हरिवनमा आयोजित एक समारोहको बिच सानिमाका ब्य्रान्ड प्रवद्र्धकद्वय मदन कृष्ण श्रेष्ठ र हरिवंश आचार्यले शुभारम्भ गरेका हुन् । कार्यक्रममा सानिमा बैंकका संचालक समितिका सदस्य भरत कुमार पोखरोल र महेश घिमिरेको पनि उपस्थिती रहेको थियो । प्राप्ति पश्चात बैंकको चुक्ता पुँजी रु. ५ अर्ब ३० करोड पुगेको छ । साथै, मेचीदेखि महाकालीसम्म शाखा संजाल ४३ वटा तथा ए.टि.एम संख्या ४९ वटा पुगेको छ ।  

आरम्भ माइक्रोफाइनान्सको दोस्रो वार्षिक साधारणसभा सम्पन्न

आरम्भ माइक्रोफाइनान्स वित्तीय संस्था लिमिटेडको दोस्रो वार्षिक साधारण सभा काभ्रेपलाञ्चोकको बनेपामा सम्पन्न भएकोे छ । साधारणसभाले आर्थिक वर्ष २०७२/०७३ को वार्षिक प्रतिवेदन तथा वित्तीय विवरणहरु पारित गरेको छ । साथै, चालू आर्थिक वर्ष ०७३/०७४ का लागि लेखापरीक्षकको नियुक्ती र पारिश्रमिक निर्धारण गर्नेका साथै संस्थाको प्रबन्धपत्र तथा नियमावलीमा आवश्यक संशोधन गर्ने लगायतका प्रस्तावहरु समेत पारित गरेको छ ।

आरम्भ माइक्रोफाइनान्सले विभिन्न ११ वटा जिल्लाहरुमा १६ वटा शाखा कार्यालयहरु संचालनमा ल्याई करिब ६००० भन्दा बढि घर परिवारलाई लघुवित्तीय सेवाहरु प्रदान गरिरहेको छ । संस्थाले हालसम्म १ करोड ५१ लाख भन्दा बढि रकम बचत संकलन गरी हालसम्म रु. २७ करोड ४३ लाख लगानी गरेको छ । झन्डै ९ करोड ४० लाख रुपैयाँ लगानी असूली गरेको संस्थाको लगानीमा बाँकी रहेको रकम रु. १८ करोड ३ लाख रहेको छ ।

लिबर्टी इनर्जी कम्पनीको सातौँ वार्षिक साधारणसभा सम्पन्न

यस लिबर्टी इनर्जी कम्पनी लि. थापाथली, काठमाण्डौको सातौँ वार्षिक साधारणसभा सम्पन्न भएको छ । बुधबार (पुस २७ गते) सम्पन्न उक्त साधारण सभाबाट सञ्चालकमा कुशकुमार जोशी, डा. आत्माराम घिमिरे, शुसिल थापा, राम बहादुर पाण्डे र राजेन्द्र वस्ती निर्विरोध निर्वाचित भएका छन् । साथै निर्वाचित संचालकहरु मध्येबाट संचालक अध्यक्षमा कुशकुमार जोशी र प्रबन्ध संचालकमा डा. आत्माराम घिमिरे नियुक्त भएका छन् । कम्पनीले आगामी ४ वर्षे कार्यकालका लागि सञ्चालकहरु नियुक्त गरेको हो ।

यस कम्पनीले २ वटा जलविद्युत आयोजनालाई अगाडी बढाईरहेको छ । जसमध्ये लमजुङ जिल्लामा रहेको २५ मेगावाट क्षमताको माथिल्लो दोर्दी “ए” जलविद्युत आयोजनाको निर्माण कार्य करिब ३०% सम्पन्न भईसकेको छ । यो आयोजना २०७५ आषाढ सम्ममा सम्पन्न गर्ने लक्ष्य कम्पनीको छ । त्यस्तै, कम्पनीले बाग्लुङ र गुल्मी जिल्लामा रहेको बडीगाढ खोलामा २१ मेगावाट क्षमताको बडिगाढ खोला जलविद्युत आयोजनाको सर्वेक्षण अनुमतिपत्र प्राप्त गरी अध्ययनको कार्य समेत गरिरहेको छ ।     

‘इच्छाशक्तिको कमीले मुलुकको विकास हुन सकेन’ 

बैंकर्स संघका अध्यक्ष अनिल केशरी शाहले नेपालमा सम्भवना धेरै भएर पनि नेपालीले चिन्न नसकेको बताएका छन् । अनेरास्ववियु पब्लिक युथ क्याम्पसद्धारा आयोजित एक कार्यक्रममा बोल्दै मेगा बैंकका सीईओ समेत रहेका शाहले नेपालीहरुमा इच्छाशक्तिको नै कमी भएको बताए । ‘नेपालमा सबै थोक छ’ उनले भने, ‘तर यहाँ इच्छाशक्ति पाउन गाह्रो छ ।’

नेपालको विकास नहुनुमा राजनीतिक नेताहरुको मात्र नभई समग्र जनताको पनि कमजोरी रहेको उनले बताए । नेतृत्वपंक्ति र पब्लिकले समेत बोल्ने मात्र तर काम नगर्ने परिपार्टी रहेको उनको भनाई थियो ।

पब्लिक युथ क्याम्पसका विद्यार्थीमा वित्तीय क्षेत्रसम्बन्धी चेतना जगाउन पुगेका शाहले कार्यक्रममा समग्र बैंकिङ प्रणाली र नेपालमा आर्थिक संमृद्धिका लागि आमयुवा र नेपालीको भुमिकाको विषयमा प्रकाश पारेका थिए । साथमा उनले कार्यक्रममा सहभागी विद्यार्थीहरुलाई आआफ्नो रुचिअनुसार पेशा तथा व्यवसायमा लाग्न सुझाव समेत दिए । 


 

भारु नोट सटहीका लागि भारतको निम्तो, राष्ट्र बैंकका अधिकारीसहितको टोली भारत जाने

प्रतिबन्धित हजार र पाँच सयको भारतीय नोट सटहीबारे छलफल गर्न डेपुटी गभर्नर चिन्तामणि शिवाकोटीको नेतृत्वमा राष्ट्र बैंकको एक टोली भारत जाने भएको छ । भारतको निमन्त्रणामा डेपुटी गभर्नरसँगै विदेशी विनिमय विभाग प्रमुख भिष्मराज ढुंगाना, अर्थमन्त्रालयका सहसचिव, परराष्ट्र मन्त्रालयका उपसचिव र भारतका लागि नेपाली राजदुताबासका एक प्रतिनिधिसहित भारतमा जान लागेको राष्ट्र बैंकका प्रवक्ता नारायण पौडेलले बताए । यससँगै अब नेपालमा रहेका भारतीय नोटको सटहीको ढोका खुलेको नेपाल राष्ट्र बैंकका प्रवक्ता नारायण पौडेलले बताए ।भारत जाने मिति भने टुंगो लागिसकेको छैन । 

गत नोभेम्बर ८ मा हजार र पाँच सयको भारतीय नोटमा प्रतिबन्ध लागेको थियो । यससँगै नेपालमा रहेका भारतीय नोटबारे अन्यौल सिर्जना भएको थियो । राष्ट्र बैंकका अनुसार नेपालको बैंक तथा वित्तीय संस्थामा साढे तीन करोड रुपैयाँ बराबरको भारतीय पाँच सय र एक हजार दरका नोट छन् ।

‘विशेष सेवा सम्मान २०७३’बाट रामचन्द्र जोशी सम्मानित

छिमेक लघुवित्त विकास बैंकका प्रमुख कार्यकारी अधिकृत रामचन्द्र जोशी फोकस नेपाल संस्थाद्वारा आयोजित विशेष समारोहमा “विशेष सेवा सम्मान २०७३” द्वारा सम्मानित भएका छन् । विभिन्न विधामा सम्मानित व्यक्तित्वहरुलाई सहरी विकास मन्त्री अर्जुन नरसिंह केसीले राजधानीमा आयोजित कार्यक्रममा सम्मानपत्र प्रदान गरेका हुन् । जोशीले लामो समयदेखि अत्यन्त निष्ठा र समर्पणका साथ वरिष्ठ आर्थिक व्यवस्थापकका रुपमा नेपाली नागरिकहरुको सेवामा सक्रिय रहँदै राष्ट्रिय तथा अन्तर्राष्ट्रिय विभिन्न आर्थिक, सेवामुलक तथा सामाजिक संघ संस्थामार्फत राष्ट्र विकास र सामाजिक सेवामा पुर्याएको योगदान चिरकालसम्म प्रशंसनीय र अतुलनीय रहने भन्दै यो सम्मान प्रदान गरिएको हो । 

उनी २०५१ सालदेखि नेपालको लघुवित्त क्षेत्रमा क्रियाशील छन् । छिमेक लघुवित्तमा स्थापनाकाल देखि नै उनी कार्यकारी प्रमुखको रुपमा कार्यरत छन् ।

छिमेक लघुवित्त विकास वैंकले हाल ६१ वटा जिल्लामा रहेका १२२ वटा शाखा कार्यालयका माध्यमवाट झन्डै तीन लाख गरीब तथा पिछडिएका घरपरिवारलाई लघुवित्तका माध्यमवाट सेवा पुर्याइरहेको छ । 

निर्धन उत्थान बैंकको तीन दिने उद्यमशीलता विकास तालिम कलैयामा सुरु

काठमाडौँको नक्सालमा केन्द्रीय कार्यालय रहेको निर्धन उत्थान बैंक लिमिटेडले आफ्ना ग्राहक सदस्यहरुका लागि तालिम सुरु गरेको छ । बैंकले पुस २४ गतेदेखि बारा जिल्लाको कलैयामा तीन दिने तालिम सुरु गरेको हो । तालिमको पहिलो दिनमा गञ्जभवानीपूर शाखा, प्रसानी शाखा र कलैया शाखाका २२ जना ग्राहक सदस्यहरु सहभागी भएका थिए । 

सो अवसरमा बोल्दै बैंकका बिरगंज क्षेत्रीय कार्यालयका क्षेत्रीय प्रमूख शम्भू न्यौपानेले ७५ वटै जिल्लामा आफ्नो सेवा विस्तार गरी देशमा रहेको गरीबीलाई आर्थिक तथा सामाजिक रुपमा कम गर्न निर्धन उत्थान बैंक लागिपरेको बताए । बैंकले प्रदान गर्ने सेवाको बारेमा बोल्दै उनले हरेक परिवारमा एक जना उद्यमी बनाउन बैंकले पहल गरी रहेको बताए । २५ वर्षदेखि निरन्तर सेवा दिई रहेको यस बैंकबाट कर्जा लिएर व्यवसाय गरी धेरै घरपरिवार आर्थिक रुपमा समृद्ध भएको समेत उनले बताए । ग्राहक सदस्यहरुकै आग्रहमा आयोजना गरिएको तालिम पुस २६ गतेसम्म चल्नेछ । 

ग्राहक सदस्यहरुलाई लक्षित गर्दै विभिन्न तालिमहरुको आयोजना गर्दै आएको निर्धन उत्थानले चालू आर्थिक वर्षको पहिलो र दोश्रो त्रैमासमा बैंकले भुकम्प प्रभावित १४ जिल्लाहरुमा २० वटा सीपमुलक तालिम सम्पन्न गरिसकेको छ । ७५ वटै जिल्लामा १७८ शाखाहरु, १० वटा क्षत्रीय कार्यालय र केन्द्रीय कार्यालय समेत गरी १८९ वटा कार्यालयहरुमार्फत लघ्ुवित्त सेवा प्रदान गर्दै आएको बैंकले ८०९१ जना ग्राहक सदस्यहरुलाई ब्यवसायिक रुपमा परियोजना कर्जा प्रदान गर्ने, ६०० जना ग्राहक सदस्यहरुलाई उद्यमशीलता विकास तालिम प्रदान गर्ने  र थप ७५० जनालाई सीप विकास तालिम प्रदान गर्ने लक्ष्य लिएको छ ।

नेपाल आँखा अस्पताललाई सिद्धार्थ बैंकको सहयोग

सिद्धार्थ बैंक लिमिटेडले नेपाल आँखा अस्पताल, त्रिपुरेश्वरलाई आर्थिक सहयोग प्रदान गरेको छ । बैंकले आर्थिक अवस्था कमजोर भएका १५ जना मोतिबिन्दुका बिरामीको मोतिबिन्दुको शल्यक्रियाका लागि आवश्यक आर्थिक सहयोग प्रदान गरेको हो । सो सहयोग रकम बैंकका नायब महाप्रबन्धक रामेश्वर प्रसाद बस्यालले उक्त अस्पतालका प्रमुख कार्यकारी अधिकृत दमन बहादुर घलेलाई हस्तान्तरण गरे । बैंकले संस्थागत सामाजिक उत्तरदायित्व निर्वाह गर्ने क्रममा सो सहयोग प्रदान गरेको जनाएको छ ।

सेञ्चुरी बैंकमा करोडौँ रकमको घोटाला गर्ने तीन जना पक्राउ

इटहरी – धरानस्थित सेञ्चुरी बैंकको शाखा कार्यालयमा कीर्ते कागज बनाई करोडौँ रकम घोटाला गर्नेलाई प्रहरीले पक्राउ गर्न थालेको छ । एक वर्षअघिदेखि उक्त बैंक घोटाला प्रकरण चर्चामा रहँदै आएको थियो । सेञ्चुरी बैंक शाखा धरानले बैंक घोटालाका सम्बन्धमा दिएको लिखित उजुरीपछि नेपाल प्रहरीको केन्द्रीय अनुसन्धान ब्युरोले छानबिन अगाडि बढाउन निर्देशन दिएलगत्तै धरान प्रहरीले घोटालामा संलग्नमध्ये तीनलाई पक्राउ गरिसकेको बताएको छ । 

पक्राउ पर्नेमा बैंकका सुन जाँचकी पदमा कार्यरत कुमार श्रेष्ठ तथा ऋणी सञ्जयकुमार राई र विशन शाक्य पक्राउ परेको इलाका प्रहरी कार्यालय धरानका प्रहरी नायब उपरीक्षक ढकेन्द्र खतिवडाले जानकारी दिए । कीर्ते कागजबाट रु नौ करोडभन्दा बढी रकम घोटाला गरिएको बताइन्छ । राष्ट्र बैंकको कारबाहीबाट बच्न बैंकका सञ्चालकको लिखित जाहेरीमा तत्कालीन सुन जाँचकी श्रेष्ठ र ऋणी दुवैलाई नियन्त्रणमा लिई अनुसन्धान कारबाही अघि बढाइएको प्रहरीले जानकारी दिएको छ ।

तल्लोस्तरका कर्मचारीले मात्रै करोडौँ घोटाला गर्न सम्भव नरहेको निष्कर्ष निकाल्दै इप्रका धरानले सिबीआइको सहयोग मागेको थियो । सिबीआइले राष्ट्र बैंककै विज्ञको सहयोगमा छानबिन र कारबाही अघि बढाउन आदेश दिएपछि धरान प्रहरीले तत्कालीन शाखा प्रमुख निखिल श्रेष्ठ, सुन जाँचकी श्रेष्ठ, ऋणी राई र शाक्य लगायतलाई नियन्त्रणमा लिनुपर्ने रायअनुसार ती तीन जनालाई पक्राउ गरेको हो । 

निखिल श्रेष्ठबाहेक निर्दिष्ट गरिएका सबै पक्राउ गरिसकेको र निखिलको पनि खोजी जारी राखिएको इप्रकाका प्रनाउ खतिवडाले जानकारी दिए । ऋणी राई धरान–९ स्थित पुतलीलाइनमा रहेको इम्मानुयल ज्वेलर्सका सञ्चालक हुन् भने शाक्य धरानका सुनचाँदी व्यवसायी हुन् । सुन कर्जामा गरिएको लगानीमा बिनाधितो नक्कली कागजात बनाएर झन्डै नौ करोडभन्दा बढी घोटाला गरेको स्वयम् बैंक शाखाले दिएको उजुरीमा उल्लेख भएको पाइएको छ । रासस

गणपति माइक्रोफाइनान्सले शाखा प्रबन्धकहरुलाई दियो अभिमुखीकरण तालिम

गणपति माइक्रोफाइनान्स वित्तीय संस्था लिमिटेडले दुई दिने अभिमुखीकरण तालिम सम्पन्न गरेको छ । संस्थाले महिना भित्र संचालनमा ल्याउन लागेको १० वटा नयाँ शाखा कार्यालका शाखा प्रबन्धकहरुको लागि पुस १८ र १९ गते तनहुँको दुलेगौंडास्थित केन्द्रीय कार्यालयमा अभिमुखीकरण तालिम सम्पन्न गरेको हो । 

तालिमको उद्घाटन यस वित्तीय संस्थाका प्रमुख कार्यकारी अधिकृत अच्युत राज सापकोटाले गरेका थिए । अभिमुखीकरण तालिममा शाखा प्रबन्धकहरुलाई वित्तीय संस्थाको नीति नियम तथा कार्यविधिहरुको जानकारी, लेखा व्यवस्थापनका साथै नेतृत्व विकास, सफलताको रहस्य तथा उत्प्रेरणा लगायतका विषयहरुमा जानकारी गराइएको थियो । वित्तीय संस्थाका बरिष्ठ प्रबन्धक विष्णु ढकाल, लेखा तथा वित्त विभाग प्रमुख अनित जंग पाण्डे र कर्जा तथा बजार व्यवस्थापन विभाग प्रमुख प्रभुराज थापाले प्रशिक्षण दिएका थिए । 

गणपति माइक्रोफाइनान्स गत कात्तिक ३० गते नेपाल राष्ट्र बैंकबाट ‘घ’ वर्गको राष्ट्रिय स्तरको लघुवित्त वित्तीय संस्थाको रुपमा इजाजतपत्र प्राप्त संस्था हो ।