Sunday , April 30 2017

अन्तर्राष्ट्रिय बैंकिङ

चिनले विश्व बैंकसँग किन लिँदैछ ५० करोड डलर ऋण ?

chinaचीनमा बढिरहेको प्रदूषण घटाउन विश्व बैंकले ऋण सहयोग उपलब्ध गराउने भएको छ । बैंकले उत्तर चीनको हपेई प्रान्तको वायु प्रदूषण कम गर्न ५० करोड डलर ऋण सहयोग उपलब्ध गराउने कुराको अनुमोदन गरेको बैंकद्वारा जारी एक विज्ञप्तिमा बताइएको छ । यस सहयोगले सो प्रान्तको प्रदूषण स्तर पीएम २.५ पार्टिकल्सलाई सन् २०१२ को तुलनामा सन् २०१७ सम्म २५ प्रतिशतले कटौती गर्ने लक्ष्य पूरा गर्न सहयोग पुग्ने बैंकका वातावरणविज्ञ तथा यस परियोजनाका प्रमुख गारो जे ब्याटम्यानियनले जानकारी दिएका छन् ।

हपेईमा बढिरहेको प्रदूषणलाई दृष्टिगत गर्दै उत्तरी प्रान्तले फलाम तथा स्टील, सिमेण्ट, ऊर्जा, यातायात तथा कृषिजस्ता प्रमुख प्रदूषण हुने क्षेत्रमा उत्सर्जन कटौतीका कार्यक्रमहरू सार्वजनिक गरेको छ । बैंकले दिने ५० करोड डलर ऋण चीनमा हुने ९६ करोड ८० लाख डलर ऋणको एक भाग भएको बताइएको छ । सो ऋण पुनःस्थापना तथा विकासका लागि अन्तरराष्ट्रिय बैंक (आईबीआरडी)को माध्यमबाट प्रदान गरिने विज्ञप्तिमा भनिएको छ । एजेन्सी

फिलिपिन्सको मुद्रास्फीति बढ्नुका २ कारण

phillipसन् २०१६ को मे महिनामा फिलिपिन्सको मुद्रास्फीतिमा उच्च वृद्घि देखिएको छ । राष्ट्रिय आर्थिक तथा विकास आयोग (एनईडीए) का अनुसार गत महिना त्यहाँको मुद्रास्फीति बढेर १.६ प्रतिशतमा पुगेको छ । मेको मुद्रास्फीति बजारले गरेको १.४ प्रतिशत अनुमानको तुलनामा बढी हो । सो अवधिमा खाद्य तथा गैरखाद्य दुवै वस्तुको भाउ बढेका कारण मुद्रास्फीतिले टेवा पाएको एनईडीएले बताएको छ ।

अप्रिलमा भने मुद्रास्फीति १.१ प्रतिशतमा रहेको तथ्याङ्क छ । निर्वाचनमा भएको खर्चका कारण माग बढ्नु र एल निनो नामक आँधीका कारण कृषिजन्य वस्तुको आपूर्ति सीमित बन्दा पनि मुद्रास्फीति उकालो लागेको हुन सक्ने विश्लेषण गरिएको छ । मेमा फिलिपिन्सको कोर मुद्रास्फीति गत वर्षको सोही अवधिको तुलनामा थोरैले बढेर १.६ प्रतिशतमा पुगेको थियो ।

गत वर्षको मेमा भने कोर मुद्रास्फीति साढे १ प्रतिशत थियो । यसमा खाद्यान्न तथा ऊर्जाको अस्थिर मूल्य समावेश छैन । मुद्रास्फीतिमा देखिएको स्थायित्वले लगानीका लागि सकारात्मक वातावरण निर्माण गर्नुका साथै गरीबका लागि आधारभूत कमोडिटिजहरू सस्तो मूल्यमा हासिल गर्न सक्ने पहुँचसमेत बढाइदिने बताइएको छ । अन्तरराष्ट्रिय बजारमा कच्चा तेलको भाउ ओर्लिएको र घरेलु अर्थतन्त्रको उत्पादन क्षमता पनि विस्तार भएका कारण यो वर्षको पहिलो ५ महिनाको व्यवस्थित मुद्रास्फीति आगामी दिनमा समेत कायम रहने अनुमान गरिएको छ । एजेन्सी

भारतको रेलवेलाई विश्व बैंकको ५० करोड डलर

world bankभारतको रेलवे विकासमा विश्व बैङ्कले ऋण सहयोग गर्ने भएको छ । रेलवे क्षेत्रको विकास योजनाका लागि प्रमुख स्टेशनमा पुनर्विकासको काम शुरू गर्न विश्व बैङ्कले ५० करोड डलर ऋण सहयोग गर्ने भएको छ । सार्वजनिक क्षेत्रको यातायात रेलवेको अधीनमा आउने विशाल भूभागमा शपिङ मल, मल्टिकम्प्लेक्स, कार्यालय परिसर, भोजनालय र ठूलो पार्किङ स्थल निर्माण गर्दै व्यापक रूपमा यात्रु सुविधा पहिलाभन्दा राम्रो बनाउन कुल ४ सय ३ ओटा स्टेशन पहिचान गरिएको छ ।

आर्थिक मन्दीसँग जुझिरहेको रेलवे क्षेत्रको विकास उसको फोकस एरिया हो र यसका लागि रोडम्याप तयार गर्ने प्रयास गरिएको बताइएको छ । केही प्रमुख स्टेशनको पुनर्विकास कार्य शुरू गर्न विश्व बैङ्कबाट ७ वर्षको अवधिका लागि ५० करोड डलर ऋण सहयोग मागिएको हो । यससँगै रेलवेको विकासका लागि केही दक्ष विदेशी संस्थाहरूसँग पनि वार्ता भइरहेको बताइएको छ । एजेन्सी

साउदी अरबले पहिलोपटक ऋणपत्र विक्रि गर्ने

saudiसाउदी अरबले पहिलोपटक नगद बढाउन ऋणपत्र बिक्री गर्ने भएको छ । ऋणपत्र खरिदको माध्यमबाट साउदी अरेबियाले झन्डै १५ अर्ब डलर उठाउने योजना बनाएको हो । तेलको मूल्यमा आएको गिरावटका कारण प्रभावित साउदी अरबले आगामी केही महिनाको अवधिभित्र बिक्री सुरु हुने त्यहाँका अर्थ मन्त्रालयका पूर्वअधिकारी जोन फाकियानाकिसले बताएका छन् । 

ऋणपत्र बिक्रीलाई सम्पत्तिको क्षेत्र रूपान्तरण गर्ने संकेतका रूपमा हेरिएको छ । पाँच वर्षअघिसम्म तेल समृद्ध मुलुक साउदीलाई यस्तो संकटको अवस्था आउनेसम्म पनि सोचिएको थिएन । तर, तेलको मूल्यमा आएको गिरावटले विशाल बजेट बचतमा समस्या पारेको छ । आफ्नो आम्दानीको तीन चौथाइ तेलमा निर्भर रहँदै आएको साउदी सन् २०१५ मा १ सय अर्ब डलर बजेट घाटामा गएको थियो । उक्त वर्ष तेल आम्दानी २३ प्रतिशतले घटेको थियो । साउदीसँग अझै ६ सय अर्बको विदेशी विनिमय सञ्चिति छ । अन्तरराष्ट्रिय मुद्राकोषले साउदी नगद अभावको अवस्थामा पुग्ने चेतावनी दिइसकेको छ ।

फाकियानाकिसका अनुसार साउदी १५ अर्ब डलर सहजै उठाउन सक्षम हुनेछ । यो महिनाको सुरुमा साउदीको एकतिहाइ मात्रै भाग रहेको ओपेक मुलुक कतारले ऋणपत्र खरिदबाट ९ अर्ब डलर उठाएको थियो । पछिल्लो समय तेलको मूल्यमा आएको सुधारले पनि साउदीलाई सहयोग पुगेको छ । मध्य फेबु्रअरीमा प्रतिब्यारेल २६ डलर पुगेको कच्चा तेलको मूल्य गत साता झन्डै दोब्बर भएर ५० डलर माथि पुगेको थियो ।

दक्षिण कोरियाको मुद्रास्फीति ०.८ प्रतिशतले बढ्यो

south koreaदक्षिण कोरियाको उपभोक्ता मूल्य गत वर्षको तुलनामा मे महिनामा ०.८ प्रतिशतले बढेको छ । चार महिनाको अवधिमा उपभोक्ता मूल्य वृद्धि १ प्रतिशत तल झरेको यो पहिलो पटक भएको बुधबार सार्वजनिक सरकारी प्रतिवेदनले देखाएको छ । प्रमुख मुद्रास्फीति फेब्रुअरी महिनामा १.३ प्रतिशत रहेकोमा मार्च र अप्रिल प्रत्येकमा १ प्रतिशतमा झरेको थियो । मे महिनामा आएर भने ०.८ प्रतिशतमा झरेको स्ट्याटिक्स कोरियाले जनाएको छ । ताजा खाने कुरा विशेष गरी तरकारीको मूल्यमा न्यून मात्रै वृद्धि भएकाले मेको वृद्धि पनि मन्द भएको हो ।

गत वर्षको दाँजोमा मे महिनामा तेल उत्पादनमा ११.६ प्रतिशत गिरावट आएको छ । सस्तो कच्चा तेलको मूल्यका कारण तेल उत्पादनको मूल्यमा पनि गिरावट आएको हो । यसले न्यून उपभोक्ता मूल्य मुद्रास्फीतिमा योगदान गरेको छ । तेल उत्पादनको मूल्यमा गिरावटले मे महिनामा समग्र मुद्रास्फीतिलाई ०.४९ प्रतिशत बिन्दुले ओरालो लाग्न सहयोग गरेको छ ।

मनी लाउण्डरिङमा मुछिएपछि सिंगापूरको बिएसआई बैँक बन्द गर्न निर्देशन

masमनी लाउण्डरिंगमा मुछिएपछि स्वीस बैँक बिएसआई एसएको ११ वर्षदेखि सञ्चालित शाखा बन्द हुने भएको छ । बैँकको शाखा बन्द गर्न सिंगापुरको केन्द्रिय बैंक(मास)ले एक साताअघि निर्देशन दिएको हो । मलेसियाका प्रधानमन्त्रीसमेत विवादमा तानिएको वान मलेसिया डेभलपमेन्ट बिएचडिको बिएसआई बैंकमार्फत भएको वित्तीय कारोवार शंकास्पद पाइएपछि सिंगापुरको केन्द्रिय बैंकले शाखा बन्द गर्न निर्देशन दिएको हो । 

केन्द्रिय बैंकले एन्टि मनी लाउण्ड्रिङ सम्वन्धी कानुनको ४१ पटक उल्लंघन गरेको पाइएपछि यो शाखालाई एक करोड १३ लाख सिंगापुर डलरको जरिवाना समेत गरेको छ । उच्च जोखिम भएका ग्राहकको ड्यु डिलिजेन्स नगरेको तथा शंकास्पद कारोवारको अनुगमन नगरेको आरोप पनि बैंकलाई लगाइएको छ । सिंगापुरको वित्तीय क्षेत्रमा बिएसआई बैंकको सञ्चालन स्थिति सबैभन्दा खराव पाइएको छ र गम्भीर त्रुटीहरु समेत फोला परेको बताइएको छ । 

मासले यो बैंकमाथि सन् २०११ यताको कारोवारमा छानविन गरिरहेको थियो भने सन् २०१५ मा मासले बैंकको शाखामै पुगेर विस्तृत अनुगमन गरेको थियो । यो अनुगमनमा एन्टि मनी लाउण्डरिङ कानुनका कयैं दफा पालना नगरेको पाइएको थियो । 

दुई सय कर्मचारी भएको बिएसआई बैंकले मलेसियाको सरकार नियन्त्रित फर्मको चार अर्व अमेरिकी डलर बराबरको फण्ड व्यवस्थापन गर्दै आएको छ । बिएसआईले मलेसियाका टाइकुन लो तायक जोको फण्ड पनि व्यवस्थापन गर्दै आएको थियो । तोसँग सम्वन्धि थुप्रै पूर्व कर्मचारीमाथि सिंगापुरको कमर्सियल अफेयर्स विभागले पनि अनुसन्धान गर्दै आएको छ । 

विश्वकै तीव्र आर्थिक वृद्धिको मुलुकको हैसियत बनाउँदै भारत

indiaभारतीय अर्थतन्त्र आर्थिक वर्ष २०१५–१६ मा ७.६ प्रतिशतले वृद्धि भएको छ । यो अघिल्लो वर्षको ७.२ प्रतिशतको दाँजोमा बढी हो । यो वृद्धिसँगै देशले ठूला अर्थतन्त्रमध्ये विश्वकै तीव्र आर्थिक वृद्धिको मुलुकको हैसियत प्राप्त गरेको छ । अप्रिलसम्मको त्रैमासिक अवधिमा भारतले ७.९ प्रतिशतको वृद्धि हासिल गरेको सरकारी तथ्यांकले देखाएको छ । यो वृद्धिदर विश्लेषकहरूको अनुमानभन्दा बढी हो । चिनियाँ अर्थतन्त्र सुस्ताएको अवस्थामा विश्वले वृद्धिका लागि अर्को मुलुक खोजिरहेको अर्थमन्त्री अरुन जेट्लीले बताए । एसियाको भविष्य बारेको सम्मेलनमा मन्त्री जेट्लीले भारतले पूर्वाधारमा खर्च गर्ने योजना बनाएको बताए ।

वर्षभरिको अवधिमा ७ प्रतिशतभन्दा बढी वृद्धि हासिल गरेका क्षेत्रहरूमा वित्तीय, रियल इस्टेट र व्यावसायिक, उत्पादनमूलक, व्यापार, होटल, यातायात, सञ्चार र प्रसारण सम्बन्धित सेवा र खानीलगायत छन् । कृषि, वन र फिसिङ क्षेत्रमा १.२ प्रतिशतको वृद्धि हासिल भएको छ । यसैगरी निर्माण क्षेत्रमा ३.९ प्रतिशतको वृद्धि हासिल भएको छ । विद्युत्, ग्यास, पानी आपूर्ति र अन्य युटिलिटी सेवाका क्षेत्रमा ६.६ प्रतिशतको वृद्धि भएको छ । यसैगरी सार्वजनिक प्रशासन, प्रतिरक्षा र अन्य सेवाका क्षेत्रमा पनि यही दरको वृद्धि हासिल भएको छ ।

स्क्रोडर्सका उदीयमान बजार अर्थशास्त्री क्रेइङ बोथामले आफूलाई भारतको वृद्धिको वास्तविक दरप्रति अझै शंका भएको बताएकमा छन् ।“उदाहरणका लागि पहिलो त्रैमासिक अवधिमा औद्योगिक उत्पादन मुश्किलैले सकारात्मक भएको थियो । सामान्यमा बाँकी आर्थिक तथ्यांक ६ प्रतिशतको हाराहारीमा छ । अन्य मानिसले यसलाई ८ प्रतिशतको हाराहारीमा हुने अपेक्षा गरेका थिए,” उनले भने । एजेन्सी

साइबर हमलामा उत्तर कोरियाको संलग्नता !

cyber attackअमेरिकी साइबर सुरक्षा कम्पनी सिम्याण्टेकले हालैका महिनामा बैंकहरूमाथि भएको साइबर हमलामा उत्तर कोरियाको संलग्नताबारे अनुसन्धान गरिरहेको छ । फिलिपिन्स र भियतनामका एकरएक बैङ्क र बङ्गलादेशको केन्द्रीय बैंकबाट पैसा चोर्ने एउटै ग्रूपमा एउटै समूह संलग्न रहेको प्रमाण भेटिएको सिम्याण्टेकले बताएको छ ।

यी घटनामा सन् २०१४ मा सोनी पिक्चर्समाथि साइबर हमला गर्न प्रयोग गरिएको जस्तै मालवेयर प्रयोग भएको पाइएको छ । उक्त हमलामा उत्तर कोरियाको संलग्नता रहेको अमेरिकी सरकारले बताएको थियो । यदि यी हमलाहरूमा पनि उत्तर कोरिया नै दोषी पाइएमा साइबर हमला गरेर पैसा चोर्ने काण्डमा कुनै देश दोषी भेटिएको यो नै पहिलोपटक हुने सिम्याण्टेकका प्राविधिक निर्देशक इरिक चाइनले अन्तरराष्ट्रिय समाचार संस्था रोयटर्सलाई बताएका छन् ।

यो वर्षको फेबु्रअरीमा ≈याकरहरूले बङ्गलादेशको केन्द्रीय बैङ्कको न्यूयोर्क फेडमा रहेको खाताबाट ८ करोड १० लाख डलर चोरेका थिए । यस चोरीमा संलग्न समूहले नै भियतनामको टाइन फोङ बैङ्कबाट १० लाख डलर चोर्ने प्रयास गरेको थियो र फिलिपिन्सको एउटा बैङ्कमाथि पनि साइबर हमला गरेको थियो । हमलाकारीहरूले यी सबै हमलामा लाजारूस मालवेयर प्रयोग गरेको पाइएको छ । एजेन्सी

विदेशी लगानीमा लगाउँदै आएको प्रतिबन्ध फुकाउँदै चीन

chinaचीनको ई–कमर्श, लजिष्टिक, लेखाङ्कन र लेखा परीक्षण लगायतका विभिन्न क्षेत्रमा विदेशी लगानीमा लगाइँदै आएको प्रतिबन्ध हट्ने भएको छ । साथै, चीनले वित्त, शिक्षा, संस्कृति र स्वास्थ्य सेवालगायत सेवा क्षेत्रका अन्य हिस्सामा पनि विस्तारै विदेशी लगानीको अनुमति दिने भएको छ ।  

निर्यात खस्कँदै गएपछि लगानी र निर्यातमा उल्लेख्य रूपमा निर्भर चिनियाँ अर्थतन्त्र सुस्ताइरहेको छ । निर्यातमा आधारित अर्थतन्त्रलाई सेवा र घरेलु मागतर्फ मोड्ने लक्ष्य हासिल गर्न सरकारले सेवा क्षेत्रमा विदेशी कम्पनीहरूलाई लगानीको अनुमति दिन लागेको हुन सक्ने विश्लेषण गरिएको छ । 

सन् २०२० सम्ममा चीनको सेवा क्षेत्रको व्यापार १० खर्ब डलरभन्दा माथि उक्लिने प्रक्षेपण काओले गरेका छन् । चीनको व्यवसाय तथा लगानी वातावरण सुधार्न र चीनको आर्थिक वृद्धिलाई टेवा दिन सक्ने सम्भावित क्षेत्रमा अमेरिकी लगानी खुला गर्न अमेरिका र चीनबीच द्विपक्षीय बैठक हुनु केही समय बाँकी रहेको अवस्थामा उनले यस्तो अभिव्यक्ति दिएका हुन् । यसलाई विश्लेषकहरूले सकारात्मक सङ्केतका रूपमा हेरेका छन् । एजेन्सी

९१ अर्ब डलरको पूरक बजेट ल्याउँदै जापान

japanजापान सरकारले करीब ९१ अर्ब डलरबराबरको पूरक बजेट ल्याउने योजना बनाइरहेको छ । स्थानीय सञ्चारमाध्यम क्योदोले बताएअनुसार सरकारले गर्मीयामको माथिल्लो सदनको निर्वाचनपछि विशेष संसद् सत्रमा यस आर्थिक वर्षका लागि भने ४५ अर्ब ३० करोड डलर देखि ९० अर्ब ७० करोड डलरबीचको नयाँ पूरक बजेट पेश गर्ने बताइएको छ । नयाँ पूरक बजेट सार्वजनिक कामका परियोजनाहरूमा खर्च गरिने बताइएको छ ।

यो चालू आवको दोस्रो अतिरिक्त बजेट हुनेछ । यसअघि मध्य अप्रिलमा दक्षिण पश्चिम जापानमा भूकम्प गएपछि सरकारले पुनर्निर्माण कार्यलाई आवश्यक रकम उपलब्ध गराउन ७ अर्ब डलरको अतिरिक्त बजेट पारित गरेको थियो । इसे–शिमा राष्ट्रिय निकुञ्जमा सात औद्योगिक राष्ट्र जी–सेभेनको शुक्रवार सम्पन्न दुईदिने सम्मेलनमा भएको छलफलहरूलाई दृष्टिगत गर्दै प्रधानमन्त्री सिञ्जो आबेले अर्को अतिरिक्त बजेट ल्याउन लागेको बताइएको छ ।

वर्तमान आर्थिक परिदृश्य सन् २००८ मा अमेरिकी लगानी बैङ्क लेहम्यान ब्रदर्श टाट पल्टिएपछिको विश्वव्यापी वित्तीय परिदृश्य जस्तै भएको भन्दै सम्मेलनमा आबेले कमजोर विश्वव्यापी माग र घरेलु खपतका बारेमा चिन्ता व्यक्त गरेका थिए । कर वृद्धिले जापानको आर्थिक पुनर्बहाली धरापमा पर्ने भयका कारण अप्रिलमा गर्ने भनिएको मूल्यवृद्धि कर बढाउने योजनालाई थाती राख्ने अपेक्षा गरिएको छ । विश्व बजारमा कच्चा तेलको भाउमा आएको कमीका कारण मुद्रास्फीतिलाई २ प्रतिशतमा पु¥याउने लक्ष्य हासिल हुन नसकेको अवस्थामा कर वृद्धिको योजनालाई सरकारले पर धकेल्ने सम्भावना बलियो बनेको छ । एजेन्सी