ग्रामीण क्षेत्रमा वित्तीय पहुँच बढाउने उद्देश्यले स्थापित सहकारी संस्थाहरु पनि सहर तथा सुगमकेन्द्रित नै हुने गरेको पाइएको छ । सहकारी विभागको तथ्यांकअनुसार हालसमम्मा दर्ता भएका ३३ हजार ६ सय ६३ सहकारी मध्ये ४८ प्रतिशत अर्थात् १५ हजार ५ सय ८५ सहकारी मध्यमाञ्चलमा छन् । त्यसमध्ये पनि सबैभन्दा बढी काठमाडौं जिल्लामा ३ हजार ७ सय २८ सहकारी दर्ता छन् । यसैगरी काभ्रेमा १ हजार ३ सय ९२ र ललितपुरमा १ हजार १ सय ४ सहकारी छन् ।
देशभरमा सबैभन्दा कम सहकारी हिमाली जिल्लाहरू मनाङ र मुस्ताङमा रहेका छन् । मनाङमा ९ र मुस्ताङमा ३६ वटामात्र सहकारी दर्ता भएका छन् । सुुदुर पश्चिमाञ्चलका विकट जिल्लामा पनि एक सयको हाराहारीमा मात्र दर्ता रहेको विभागले जनाएको छ ।
