प्रभु इन्स्योरेन्स लिमिटेडले भोली (जेठ ३१ गते)देखि ४८ हजार एक सय २२ दशमलव ८१ कित्ता हकप्रद साधारण सेयर लिलामीमा निकाल्ने भएको छ । कम्पनीले असार ७ गतेसम्म लिलामीमा सेयर विक्री गर्ने निर्णय गरेको छ ।
कम्पनीले २०७३ चैत ३० गतेदेखि २०७४ जेठ २ गतेसम्म हकप्रद सेयरको विक्री खुला गरी आवेदन माग गरिएकोमा बाँडफाँट भई बाँकी रहेको संस्थापकतर्फ पाँच हजार तीन सय ३४ दशमलव ४९ कित्ता र सर्वसाधारणतर्फ ४२ हजार ७ सय ८८ दशमलव ३२ कित्ता साधारण सेयर लीलामीमा विक्री खुला हुने भएको छ ।
सेयरको न्यूनतम मूल्य प्रति सेयर एक सय रुपैयाँ तोकिएको हुँदा सो वा सो भन्दा बढी मूल्य अङ्कित गरी बोलकबोल गर्नुपर्ने छ । कम्पनीको सेयर खरीदको लागि बोलकबोल गर्दा न्यूनतम सय कित्ता वा सो भन्दा १० ले भाग जाने सम्पूर्ण आवेदन दिन सक्नेछ ।
आवेदन दिई बाँडफाँटमा नपरेका आवेदकहरुको रकम फिर्ता भुक्तानी पूर्जा असार १२ गतेदेखि कम्पनीको सेयर रजिष्ट्रारबाट चेक मार्फत वितरण गरिन्छ । बाँडफाँटमा परेका आवेदकहरुलाई आवेदककै हितग्राही खातामा सेयर नामसारी गरिने हुँदा आवेदनमा हितग्राही खाता अनिवार्य रुपमा उल्लेख गर्न आह्वान गरिएको छ । कम्पनीको सेयर निष्काशन तथा विक्री प्रबन्धक प्रभु क्यापिटल लिमिटेड रहेको छ ।
