जनता बैंक नेपाल लिमिटेडले चालु आर्थिक वर्षको तेस्रो त्रैमासमा ३८ करोड १८ लाख रुपैयाँ खुद मुनाफा आर्जन गरेको छ । बैंकले गत आर्थिक वर्षको सोही अवधिको तुलनामा ६८ दशमलव ५८ प्रतिशत बढी नाफा कमाएको हो । गत आर्थिक वर्षको तेस्रो त्रैमासमा जनताले २२ करोड ६६ लाख रुपैयाँ खुद मुनाफा आर्जन गरेको थियो ।
चार अर्ब ६४ करोड ६२ लाख रुपैयाँ चुक्ता पूँजी भएको बैंकले जगेडकोषमा ८४ करोड छ लाख रुपैयाँ राखेको छ । बैंकले निक्षेपमा ५९ दशमलव ०९ प्रतिशतले वृद्धि गरी ३५ अर्ब ४६ करोड ५७ लाख रुपैयाँ संकलन गरेको छ भने कर्जामा ३३ अर्ब २४ करोड दुई लाख रुपैयाँ लगानी गरेको छ । खुद व्याज आम्दानी ४० दशमलव ०३ प्रतिशतले बढेर ७४ करोड ५२ लाख रुपैयाँ पुगेको बैंकको संचालन मुनाफा ५१ दशमलव ६५ प्रतिशतले बढेर ४५ करोड ८५ लाख रुपैयाँ पुगेको छ ।
यो अवधिमा १४ करोड रुपैयाँ खराबकर्जा उठाएको बैंकले प्रोभिजनमा १२ करोड पाँच लाख रुपैयाँ राखेको छ । बैंकको निष्कृय कर्जा शुन्य दशमलव ७५ प्रतिशतले बढेर एक दशमलव ९८ प्रतिशत पुगेको छ भने पुँजीकोष अनुपात तीन दशमलव ७१ प्रतिशतले बढेर १० दशमलव ७३ प्रतिशत पुगेको छ । बैंकको प्रतिसयर आम्दानी १० दशमलव ९६ रुपैयाँ, मुल्य आम्दानीको अनुपात ३५ गुणा, प्रतिसेयर नेटवर्थ एक सय १८ दशमलव १० रुपैयाँ र तरलता अनुपात २२ दशमलव १० प्रतिशत रहेको छ ।
