कालिका माईक्रोक्रेडिट डेभलपमेन्ट बैक लिमिटेडले चालू आर्थिक वर्षको दोस्रो त्रैमासमा एक करोड ३९ लाख रुपैयाँ खुद मुनाफा आर्जन गरेको छ । बैंकले गत आर्थिक वर्षको सोही अवधिको तुलनामा २२ दशमलव ८६ प्रतिशत बढी नाफा कमाएको हो । गत आर्थिक वर्षको दोस्रो त्रैमासमा कालिकाले एक करोड १३ लाख रुपैयाँ मुनाफा आर्जन गरेको थियो ।
पाँच करोड रुपैयाँ चुक्ता पुँजी रहेको कालिका माईक्रोक्रेडिटले निक्षेपमा ४९ दशमलव ९५ प्रतिशतले वृद्धि गरी २५ करोड ५८ लाख रुपैयाँ संकलन गरेको छ । कर्जातर्फ कम्पनीले ३६ दशमलव ७१ प्रतिशतले वृद्धि गरी ५३ करोड ७१ लाख रुपैयाँ लगानी गरेको छ । कम्पनीको खुद व्याज आम्दानी २८ दशमलव ०४ प्रतिशतले बढेर तीन करोड ३८ लाख रुपैयाँ पुगेको छ भने संचालन मुनाफा १८ दशमलव ९२ प्रतिशतले बढेर दुई करोड चार लाख रुपैयाँ पुगेको छ ।
निष्कृय कर्जा एक दशमलव ७० प्रतिशत र जोखिमयुक्त सम्पत्ति २४ दशमलव १८ प्रतिशत रहेको कालिकाले जगेडाकोषमा ७ करोड ५४ लाख रुपैयाँ राखेको छ भने प्रोभिजनमा ४५ लाख रुपैयाँ राखेको छ । कम्पनीको प्रतिसेयर आम्दानी वार्षिक ५५ दशमलव ९८ रुपैयाँ, मुल्य आम्दानीको अनुपात वार्षिक २९ दशमलव ४५ गुणा, प्रतिसेयर नेटवर्थ दुई सय ५० दशमलव ९२ रुपैयाँ र तरलता अनुपात १३ दशमलव ४२ प्रतिशत रहेको छ ।